Duke e cilësuar mbledhjen si një takim pune për të dakorduar qëndrimin që do të mbajë delegacioni, Ahmetaj theksoi se synohet që të dilet në një qëndrim unanim të të gjithë anëtarëve të delegacionit, pa bërë dallime partiake. “Ishte një takim pune i delegacionit të KE për qëndrimin që do të mbahet në Strasburg. Do ketë përgatitje për hartimin e qëndrimit tonë zyrtar. Synojmë një qëndrim të përbashkët”, deklaroi deputeti Arben Ahmetaj, I cili shtoi se nuk kishte asnjë pikë, ku opozita dhe mazhoranca ndaheshin në lidhje me këtë çështje. Sidoqoftë ngelet akoma për t’u parë, pasi është herët për të folur se për cilat pika të projektrezolutës Shqipëria do të paraqesë amendamente, por ajo që dihet është vetëm reagimi zyrtar e kryeministrit shqiptar Berisha, se: “Shqipëria është e gatshme për të lejuar cdo hetim në territorin e saj.”
Delegacioni shqiptar që do të marrë pjesë në Asamblenë Parlamentare të Këshillit të Europës, që do të zhvillojë punimet e saj nga data 24 deri më 28 janar, do të kundërshtojë me forcë akuzat e bëra nga Dick Marty, të paraqitura në KiE në dhejtorin e kaluar. Kriza politike që ka përfshirë vendin prej më shumë se një vit e gjysëm, duket se do harrohet për pak kohë, dhe kjo falë anëtarit të Këshillit Europian, Dick Marty dhe akuzave të bëra nga ai. Marty me akuzat e bëra në raportin e tij në lidhje me shtëpinë e verdhë, e cila, sipas pretendimeve të tij, ndodhet në një fshat të Burrelit, dhe që është përdorur nga Ushtria Çlirimtare e Kosovës për transplant organesh, ka bashkuar pas kaq kohësh mazhorancën dhe opozitën shqiptare, të cilat për herë të parë që nga zgjedhjet e kaluara do të kenë qëndrim të njëjtë mes tyre, për të bërë të mundur rrëzimin e raportit të Martyt. Ky është objektivi i parë dhe i vetmi i delegacionit shqiptar në punimet e Asamblesë Parlamentare të Këshillit të Evropës, nga data 24 deri më 28 janar. Rrëzimi i raportit të Dick Martyt, përmes të cilit akuzohet direkt edhe kryeministri i Kosovës, Hashim Thaçi që si ish-komandant i Ushtrisë Çlirimtare të Kosovës, përgjatë konfliktit të Kosovës të vitit ’99, ka trafikuar organet e ushtarëve serbë. Në lidhje me këtë qëndrim të tillë unik ka nisur dje mbledhja mes anëtarëve të shumicës qeverisëse dhe opozitës që do të marrin pjesë në delegacionin shqiptar që do të kryesohet nga kryeministri i vendit, Sali Berisha. Mësohet se delegacioni shqiptar do të kërkojë rrëzimin e raportit të Martyt, si një raport që bie ndesh dhe me parimet e Këshillit të Evropës.
