Një delegacion nga Agjencia e Privatizimit të Bosnje e Hercegovinës po qëndron në Prishtinë, ku është pritur nga biseduar drejtori menaxhues i Agjencisë Kosovare të Privatizimit, Shkelzen Lluka. Ata kanë diskutuar për mundësitë e bashkëpunimit dhe koordinimit më të ngushtë në mes agjencive të privatizimit të dy shteteve. Lluka i ka njoftuar zyrtarët boshnjakë Senad Rahimiç dhe Suhret Fazliç për infrastrukturën ligjore me të cilën zhvillohet procesi i privatizimit të ndërmarrjeve shoqërore në Kosovë, me ecurinë e privatizimit deri më tani dhe për angazhimet e AKP-së në përmbylljen sa më të shpejtë dhe më të suksesshëm të këtij procesi me rëndësi për zhvillimin e ekonomisë së lirë të tregut. “Drejtuesit e AKP-së dhe ata të Agjencisë së Privatizimit të Bosnje e Hercegovinës janë pajtuar për vendosjen e kontakteve zyrtare në mes dy agjencive të privatizimit me qëllim të identifikimit dhe trajtimit të ndërmarrjeve shoqërore të Kosovës dhe aseteve të tyre që gjenden në Bosnje e Hercegovinë dhe ndërmarrjeve e aseteve të BiH në vendin tonë”, thuhet në një njoftim të AKP-së. Gjithashtu, sipas AKP-së, në këtë takim u shtrua nevoja e bashkëpunimit më të afërt në mes të dy agjencive me qëllim të këmbimit të përvojave në zhvillimin e procesit të privatizimit në Kosovë dhe Bosnje e Hercegovinë.
