Pasi kanë protestuar në rrugë dhe kanë bërë thirrje për largimin e EULEX-it, përfaqësuesit e shoqatave të dala nga lufta u kanë kërkuar institucioneve të Kosovës që ta shqyrtojnë zyrtarisht mandatin e misionit evropian për sundimin e ligjit. Ndërkohë, përfaqësues të partive politike nuk kanë sqaruar nëse do të mund të bëjnë hapin për diskutimin e kësaj çështjeje në Kuvendin e Kosovës.
Shefi i grupit parlamentar të PDK-së, Adem Grabovci, ka thënë për Telegrafin, se nuk kanë marrë zyrtarisht ndonjë kërkesë të tillë, por nëse thirret një seancë e jashtëzakonshme, atëherë aty do të flitet me gjuhën e argumenteve, e jo për të shfryrë inate.
“Kjo sepse ne kemi shprehur besimin tonë në organet e drejtësisë ndërkombëtare. Ne kërkojmë që EULEX-i të luajë rolin e mirëfilltë për të cilin ka ardhur, të ndajë drejtësi në bazën e argumenteve, e jo të thashethemeve. Jam i sigurt se akuza të ngjashme siç po ju bëhen ish-drejtuesve të luftës çlirimtare nuk ka ndodhë dhe nuk mund të ndodhin në asnjë shtet të BE-së”, ka thënë Grabovci.
Deputeti nga radhët e Lëvizjes Vetëvendosje, Rexhep Selimi, ka thënë se ata e kanë bërë një kërkesë për shqyrtimin e misionit të EULEX-it në Kosovë për shumë vjet.
“Ne kemi dëgjuar deklarime nga deputetët e partive në pushtet se në njërën prej seancave do të shqyrtohet edhe çështja e punës së EULEX-it. Po i presim, nëse ata e nisin këtë, ne e shqyrtojmë. Ne e kemi thënë qysh herët, ju po e thoni tash, atëherë fillojeni”, ka thënë Selimi, për Telegrafin.
Ndërkohë, deputeti i Kuvendit të Kosovës nga radhët e LDK-së, Haki Demolli ka deklaruar për Telegrafin, se LDK ende nuk ka një qëndrim nëse do të mund të kishte debat parlamentar për çështjen e pranisë së EULEX-it në Kosovë.
“Personalisht si deputet jam i rezervuar pak, sepse kjo është çështje që rregullohet brenda akteve normative. Unë jam që EULEX-i ta kryejë mandatin e vet ashtu siç parashihet me dispozita ligjore”, ka thënë Demolli.
Në anën tjetër, duke komentuar arrestimin e ish-drejtuesve të UÇK-së, Adem Grabovci ka thënë se duke e aplikuar një drejtësi selektive, EULEX po e devalvon veten dhe po e humbë besimin. Ai ka vlerësuar se ky rast e ka provokuar situatën shumë rëndë.
“Ne jemi duke u përballur me tendenca shumë negative, që mund të shkaktojë pasoja për të ardhmen. Ne jemi të interesuar që ta ruajmë stabilitetin, sepse në të kundërtën diçka e tillë do t’i shkonte për shtati armiqve tanë”, ka vlerësuar Grabovci.
Sipas tij, është e papranueshme që të akuzohen drejtuesit e luftës çlirimtare, por në anën tjetër të mbyllen sytë para krimeve të rënda të kryera ndaj shqiptarëve nga ana e forcave serbe.
“Kjo bëhet edhe më absurde kur akuzohen njerëzit që i kanë 14 anëtarë të familjes të vrarë. Ndërkohë, është e padëgjuar dhe e paparë që dikush të akuzohet për krim të luftës nëse e ka ndaluar dikë ose ia ka dhënë një shuplakë”, ka vlerësuar Grabovci. (A. Fazliu)
