Sot, kur e kthejmë kohën pas, është pothuajse e pamundur të kuptohet se si ajo katastrofë humanitare u ngjiz në kontinentin e evropian në prag të mileniumit të ri.
Pas kampeve të përqendrimit ndaj hebrenjve, u tha “kurrë më s’do lejohet diçka e tillë”.
Por, vula e kësaj djallëzie kaloi mbi trupa shqiptarësh.
Në kufirin me Maqedoninë, në Bllacë, viti 1999 po përmbyllte një cikël ku çnjerëzorja po gëlltiste trupa.
Prapa këtyre trupave mbeteshin tokat e stërgjyshërve, ëndrrat, kujtimet, lotët, lindjet, dashuritë dhe varret.
Mbesnin luftëtarët të cilët patën guximin t’i kthenin pushkën njërës prej ushtrive më të fuqishme në Evropë. Ishte Serbia ajo që donte me çdo kusht zhdukjen nga kjo tokë të një populli të tërë, vetëm pse ky popull ishte shqiptar.
Pasardhësit e Lekës, Pirros e Skënderbeut po vuanin; kishin mbetur pa shpi e pa atdhe, të detyruar të merrnin rrugët e botës, këmbëzbathur e barkthatë, me sy të shterur nga lotët…
Njëzet vite pas, një memorial trenash të cilët bartën mijëra shqiptarë, më ngjall një emocion të përzier.
Kur e mendoj çfarë kemi kaluar, ndihem thellësisht i trishtuar; por kur e shoh që pas njëzet vitesh kemi një shtet, jam i lumtur.
Le të jetë shenjë kujtimi për brezat që do vijnë vuajtja.
Mos të na humbas as një çast nga kujtesa momenti ku ishim dje, ku jemi dhe ku duam të shkojmë.
Faleminderit NATO-s dhe presidentëve Blair e Clinton të cilët na ndihmuan.
Viti 1999 shënon një kthesë për shqiptarët: bota e kuptoi se ky popull nuk ushtroi gjenocid dhe dhunë ndaj askujt, veçse qe i detyruar me mish e shpirt të luftojë për të jetuar me dinjitet në trojet e veta që u lanë trashëgim dhe amanet nga të parët.
Autori i librit, të promovuar për eksodin e vitit 1999 e njohur si Bllaca 99, Jahja Lluka, ka shpjeguar më shumë për këtë libër duke thënë se ky libër është mundësi që të mësohen sakrificat e shqiptarëve
*****
Lluka: Libri Bllaca ’99 ka për qëllim që fëmijët tanë të kenë mundësi t’i lexojnë sakrificat
Nga Ernesa Abazi
Qëllimi i këtij libri, sipas tij, është që përjetimet të mbeten të dokumentuara dhe pasardhësit tanë të kenë mundësi që t’i lexojnë ato.
“Qëllimi i këtij libri është që përjetimet e atyre që kanë kaluar nëpër Bllacë mos të mbesin në kafehane dhe tavolina të restoranteve, duke thënë kam qenë e kam vujt, por t’i grumbullojmë në një libër që fëmijët tanë të kenë mundësi t’i lexojnë të gjitha ato sakrifica që i kanë përjetuar 440 mijë shqiptarë që kanë kaluar nëpër Bllacë,” u shpreh Akademik Jahja Lluka.
Sipas Llukës, Bllaca ka qenë ferri dhe tmerri i shqiptarëve dhe qëllimi përfundimtar i gjithë kësaj ka qenë shfarosja e popullit shqiptar të Kosovës.
“Këtu kemi rrëfime autentike të njerëzve që kanë përjetu dhunën nga shumë njerëz eminentë të Kosovës, duke u nisur nga ambasadori Avni Spahiu për shembull që policia e Serbisë i ka dhënë 15 sekonda të largohet nga Prishtina”, shtoi Lluka.
Rasti tjetër që po ashtu është shumë prekës që një foshnje katërmuajshe ka vdekur në Spitalin e Shkupit, sipas Llukës, me përpjekje të mëdha të vullnetarëve shqiptarë është nxjerrë nga kampi i Bllacës.
“Foshnja kishte vdekur dhe vorrosur në Saraj.”
Ai tregoi se është dashur kohë që të punohet në këtë libër dhe të mblidhen informacione.
“Një vit kemi punuar në këtë libër dhe ne na është dashur të gjejmë familjen e djalit, meqenëse na u tha se është nga Sllatina, unë dojsha me vërtetu krejt rrëfimin që mos të dalë diçka e pavërtetë në libër, pastaj shkuam në Saraj”.
Në Saraj ai tregoi që e kanë gjetur varrin dhe familja ishte nga Shkabaj, e rrëfimi i tyre kishte qenë njëjtë si i komandantit Daim Hysenit.
“Në këtë libër janë të dokumentuara shumica e varrezave, shqiptarët nuk kanë ditur as ku po shkojnë e më së keqti kanë kaluar njerëzit e fshatrave të Kaçanikut, që kufirin e kanë kaluar nëpër fshatin Bllacë”, tregoi Lluka.
Përgatiti "Floripress"
No comments:
Post a Comment