Shantazhet e PDK-së
Partia Demokratike e Kosovës ka vendosur të ndërmarrë hapa konkretë në drejtim të rikomponimit të Qeverisë.
Një numër i konsiderueshëm i anëtarëve të Kryesisë së kësaj partie kanë ardhur në përfundim se Hashim Thaçi nuk ka bërë zgjidhje të duhur kur ka vendosur të lidhë partneritet me Behgjet Pacollin.
Organi drejtues i PDK-së, sipas burimeve brenda kësaj partie, është përcaktuar që prishjes ose vazhdimit të koalicionit aktual me Koalicionin Kosova e Re t’i paraprijë një analizë, të cilën duhet të bëjnë udhëheqësit më të lartë, duke nisur nga kryetari Thaçi, sekretari, Jakup Krasniqi dhe katër nënkryetarët, Fatmir Limaj, Rrustem Mustafa, Bajram Rexhepi dhe Hajredin Kuçi.
Nga kjo përbërje së paku Limaj dhe Krasniqi dihet se kanë qenë kundër koalicionit me KKR-në që nga fillimi. Publikisht ata e kanë pranuar se nuk e kanë votuar Pacollin për president. Veç kësaj, të dy e kanë kritikuar liderin e partisë për autoritarizëm, për shkak të marrjes së vendimeve pa e pyetur Kryesinë e partisë.
Paralajmërimet për prishje të koalicionit e kanë “lodhur” edhe Pacollin. Ai as vetë nuk e ka përjashtuar mundësinë që të japë dorëheqje posa të kthehet nga një vizitë zyrtare jashtë shtetit. Shefja e Grupit parlamentar të KKR-së, Myzejene Selmani, megjithatë konsideron se koalicioni jo që nuk është në krizë, por është duke funksionuar ashtu si duhet. Ajo nuk ka dashur të paragjykojë se çka do të sjellë analiza e PDK-së, duke thënë se tekefundit, kjo është punë e brendshme e PDK-së.
“PDK-ja mund të bëjë analiza, por për koalicionin janë përgjegjës dy veta, Pacolli dhe Thaçi. Ata duhet të ulen dhe të bisedojnë për këtë punë”, ka deklaruar Selmani.
Një nga zyrtarët e lartë të PDK-së ka deklaruar të martën se jo rastësisht është vendosur t’i bëhet analizë koalicionit. “Askush në Kryesi nuk pret që Krasniqi dhe Limaj të bëjnë analizë pozitive për koalicionin, duke i pasur parasysh qëndrimet e mëhershme të tyre. Qëndrim pozitiv nuk pritet të nxjerrë as Mustafa”, ka thënë ky zyrtar.
“Prandaj, fundi i bashkëqeverisjes me KKR-në varet nga shpejtësia e nxjerrjes së analizës”, ka shtuar ai.
Kërkesa e deputetit të Partisë Demokratike të Kosovës, për dorëheqjen e zëvendëskryeministrit, Behxhet Pacolli, dhe më pas mbledhja e kryesisë së PDK-së për këtë çështje, nga analistët politikë, por edhe opozita parlamentare, konsiderohet më shumë si presion ndaj Aleancës Kosova e Re sesa si kërkesë për dorëheqje. Madje sipas tyre, veprimi i djeshëm i PDK-së paralajmëron fundit e koalicionit aktual,Hashim Thaçi-Begjet Pacolli.
Ata konsiderojnë se është duke u luajtur lojë e ashpër mes anëtarëve të kabinetit qeveritar, mes anëtarëve të koalicionit si dhe brendapërbrenda vetë partive dhe si duket kryeministri Thaçi po saboton dhe po shantazhon anëtarët e kabinetit të tij.
Shefi i Grupit Parlamentar të PDK-së, Adem Grabovci, ndërkaq ka përjashtuar çdo mundësi se po i bëhet presion Koalicionit për Kosovë të Re. Madje siç ka thënë ai, koalicioni PDK-KKR po funksionon si është më së miri. “Nuk ka kurrfarë presioni ndaj KKR-së. Koalicioni po ecën në mënyrën më të mirë të mundshme dhe se kemi raporte të mira dhe koordinim të mirë me ta. Ndërkaq, kërkesa e deputetit të PDK-së për dorëheqje të Pacollit është qëndrim individual dhe se nuk është qëndrim i GP të PDK-së”, ka thënë Grabovci.
Ndërkaq, anëtarja e Kryesisë së AKR-së, Myzejene Selmani, ka thënë se kërkesa e deputetit të PDK-së është veç një opinion i tij.
Qeveria e Kosovës nuk merret me Begjet Pacollin e Astrit Haraqinë
Partnerët e koalicionit nuk kanë dhënë shenja se do të ketë dorëheqje apo shkarkim të dy zyrtarëve të lartë, që u përfshinë në aferën e privatizimit të hotelit ‘Grand’.
Përderisa krerët më të lartë të PDK-së, pjesë e Qeverisë së Kosovës, nuk po deklarohen rreth shkarkimit të zëvendëskryeministrit Behgjet Pacolli dhe Astrit Haraqisë për aferën në rastin e privatizimit të hotel ‘Grandit’, partitë opozitare po kërkojnë që për këto skandale të bjerë poshtë e gjithë Qeveria, sepse kjo gjendje, sipas tyre, po e rendit Kosovën në listën e vendeve më të korruptuara.
Që nga koha kur janë përfolur Pacolli dhe Haraqija askush nga kabineti qeveritar nuk ka dhënë një përgjigje për këtë skandal. Madje zëvendëskryeministri Hajredin Kuçi ka konsideruar se çështja e Pacollit është shumë e vogël që PDK-ja të merret me të, shkruan Kosova Sot.
“Partia Demokratike e Kosovës flet vetëm për gjëra të mëdha”, ka thënë Kuçi.
Aleanca Kosova e Re (AKR) ka shprehur zhgënjimin me punën dhe efikasitetin e institucioneve të rendit dhe ligjit, në raport me menaxhimin e situatës me rastin e “Grandit”.
Ky subjekt politik, përmes një njoftimi, konsideron të pacenueshëm rendin dhe ligjin dhe vlerëson se tendenca e politizimit të situatës ka krijuar konfuzion dhe paqartësi në opinionin publik.
AKR-ja beson në drejtësinë në Kosovë dhe thërret në efikasitet dhe në paanshmëri. Ndërsa deputeti i LDK-së, Skënder Hyseni, ka thënë për Kosova Sot se në Qeverinë e Kosovës është duke ndodhur ajo që kishte paralajmëruar dhe të gjitha këto manipulime të Pacollit dhe Haraqisë, sipas tij, janë pasojë e asaj që me kohë u ishte tërhequr vërejtja.
Ndërkaq deputetja e AAK-së, Donika Kada – Bujupi, ka thënë se Qeverisë së Kosovës nuk i ka mbetur fije morali që të pranojë skandalet që po ndodhin në ekzekutiv.
Edhe lëvizja ‘Vetëvendosje’ konsideron se duhet shkarkuar e gjithë Qeveria, për shkak të skandaleve që po ndodhin nga disa pjesëtarë të kabinetit qeverisës.
