Poezi nga poeti ynë i njohur Gezim Ajgeraj

Gëzim Ajgeraj

LETËR TË DASHURVE TË MI


Ta shijoni ju bukën e kurbetit

Kur shtrohet në sofër i ngjanë pelinit

Mos ulëshi kurrë fjalë e amanetit

Large bukës së mallit sofrës së mërgimit



Me të djegëshmin mall letrën e kam shkruar

Kërkoni atje ëndrrat ti ndërtoni

Se këtej nga ne mbetesh i harruar

Udhët dhe kurbetin përherë ti mallkoni



Nga Alpet e Zvicrës sot kur ju shkruajë

Me dorën plot dridhmë e lodhjen mbi ballë

Na është shtjerrë djersa këtij dheu të huajë

Nga motet e mosha të djegur në mall



Në këtë vend vëlla ka një moto tjetër

Njeriu lindë për punë jo për të jetuar

Këtu jemi numër dhe asgjë më tepër

Numër si robotët veç për të punuar



Neve vëlla i dashur jemi të mallkuar

Tek i djegim motet e ushqejmë shpresën

Fillojmë paradiellit deri përënduar

Me keto udhë mërgimi e djegim vetveten



***



Shpeshherë e kujtojë orën e Historisë

Kur mësonim në libra për skllav e pronar

Mos bini në kurth udhëve arratisë

Vërtet ky kapitull nuk ishte përrallë



Kush shet lumturi nga kjo udhë e jonë

Moti i ka shitur i janë vërbuar sytë

Do të mbetet i huaj nga do e ku shkon

Për herë do të ngelë në klasën e dytë



Ta kujtoj mëmëdheun se ku e ka lënë

Dhe zjarrin në votër qysh moti të shuar

Njësoj sikur njerkës kur i thuhet nënë

Nën strehën e huaj përherë i mallkuar



Mbetëm vetëm numër tani mbi këtë top

Të huaj këtu të huaj atje

Ku ta djeg këtë emër e ti bëj një gropë

Ah, këtyre ikjeve njerëz pa atdhe



Një skaj pasqyreje e udhëve mërgimit

Të shiheni ju atje e ju mërgimtarë

Lërini lakmitë ikjeve harrimit

Shikoni ballin tuaj të zhuritë në mall



***



Një cicërrimë bilbili në dritare ra

Me rrezet e diellit mbushëlloi Vërrini

Isha në mëmëdhe s'më rëndoi ky mall

Largë këtyre udhëve që më sjelli trishtimin



Në pëllëmbë të dorës Vërrini më ra

Rrëzë bjeshkëve të Sharrit deri buzë Pashtrikut

Të shihni ç'fusha Prizereni ka

E ne i braktisim vai për ne lum miku



Dhe këto bjeshkët tona minerale plotë

Kërkojnë djersën tonë ti thirrim kthimit

E ne nëpër botë mallit derdhim lot

Hym në hak të mëmëdheut na mbyti mallkimi



***



Asgjë s'janë të mirat në dheun e huajë

As fjalën mërgim më s'mund ta duroi

Ah kjo fjalë plotë mall po më bën të vuajë

Larg këtyre udhëve kush mos ta provoi



Ruaju harrimit një mik më tha

Se dheu i huajë shumkëndë ka harruar

Si Prizreni ynë vend në bot nuk ka

Të mirat e huaja shumkënd e kanë mashtruar



Kjo fjalë më hodhi larg në Andaluzi

Dhe Alkimisti i Cohelos tek bredh nëpër dhe

Njeriu shëtit boten shpesh për pasuri

Ndërsa pasurinë e ka në atdhe

NËNË, MË FAL PËR LOTËT E TUA

Nënë
si të ta fshij lotin
Unë rob i udhëve
Largësia në mes
u bë lot në shami
E di
Po si t’ia bëj
me udhët
Unë zog i arratisur?...

SOT PO TA NIS MALLIN

Për sonte
po ta nis mallin
Nuk më ka mbetur
asgjë pranë
pos etjes për dorën tënde
mbi ballin tim
dhe zjarrmisë
që përvëlon
Oh,
ç'zjarrmi kam sonte
Nënë...

DHEMBJE NË PLAGË

Plagët e tua
ende pikojnë gjak
Ti dhembja ime
si ta shërojmë kohën,
më thuaj?
Kur do ta marrim vallen e lirisë
të mbushullojë kënga e fitores
Nga dhembjet shtrydhen kodrat tona
Plagët (me të cilat e shkruam
                        biografinë e dritës)
me melhemin e gjysmë-lirisë
dhembjes ia shërojmë plagët
Kohëkuqja është plaga jonë
nëpër ditët e bardha
Pa Ju na dhemb mungesa
Me Ju patën shkëlqim malet
kah i sfidonit territ
Tani, bardhësive i thurim këngët për Ju
jeni bërë dhembje në plagë

NOSTALGJI

Më vjen pranverës i përmalluar
Me sytë e zi qerpik rënduar
Thellë në zemrën e lënduar
E më gjen përvëluar
Ai lot në sytë e tu
Që gremiset sikur shi
Lumë rrjedh para meje
E më zgjon nostalgji
Flokut tënd por si ar
Derdhet erë e mallit tim
E unë kujtimeve ziliqare
I marr vitet në përqafim
Ikën motet mallit tënd
Fatit tonë të mallkuar
Ti atje e unë këtu
Kujtimet tona i mbajmë në duar
Ah, pranverë mall trazuar

Gëzim Ajgeraj lindi më 06.08.1967në Malësin e Vërrinit, është anëtarë i  LSHK me seli në PRISHTINË. Nga 23.03.2002  është antarë i lidhjes së shkrimtarëve të Zvicrës (SSV). Jeton dhe krijon në shtetin Helvetik-Zvicër.

Ka bashkëpunuar dhe bashkëpunon me të gjitha gazetat dhe revistat e kohës, si: “Rilindja”, Zvicër - Prishtinë, “Bujku”, - Prishtinë, “Zëri i Kosovës”, Zvicër - Prishtinë, “Bota sot”,- Zvicër, “Koha ditore”, - Prishtinë, “Epoka e re”, - Prishtinë, “Zëri”,- Prishtinë”, “Fakti”, - Shkup, “Ars” – Tiranë, “Penashqiptare”, - Prishtinë, “Pioneri” – Prishtinë, “Zogu i mëngjesit”, - Prishtinë, etj. Nga janari i vitit 2004, editon revistën: Metafora poetike (Editorial i poetit) që del çdo tre muaj.

Botoi këto libra 

1. Klithmë malli, poezi, „Rilindja“, Prishtinë,1997
2. Ëndrra për parajsë,poezi,“Rilindja“,Prishtinë, 1998
3. Qiellit po digjem, poezi, „Rilindja“, Prishtinë, 1998
4. Flakë në plagë, poezi, „Rilindja“, Prishtinë, 1998
5. Kënga e babait, poezi për fëmijë, „Apolonia“, Prishtinë, 1998.
6. Urti popullore të Vërrinit 1 (bashkautorësi), „Apolonia“, Prishtinë,1998
7. Mallëngjimi, poezi, „Rilindja“,2000.
8. Balada e Vërrinit, K.L. „F. S. Noli“, Prizren, 2001.
9. Rruga e lirisë, Dramë, „Meshari“Prishtinë, 2001.
10. Rruga e lirisë (intervistë) me Zafir Berishën, botoi Asociacioni i veteranëve të ish UÇK-së – Prizren, 2002.
11. Atdheu në trastë-cikli me poezi, e botoi revista letrare "Jeta e re" nr. 4, korrik-gusht 2002, viti LIV. Prishtinë.
12. Pëllumbat e lirisë, Novelë për fëmijë, Edicioni i revistës; Fidani, Prizren, 2004.
13. Ditët e bardha, Novelë për fëmijë, Edicioni i revistës; Fidani, Prizren, 2004.
14. Atdheu i copëtuar-cikël me poezi, në librin: Pikoi molla gjak (Lirikë me motive arvanitase), botoi MKRSÇJR-Departamenti i Çështjeve Jorezidente, Prishtinë, 2004.
15. Cikël me poezi “Udhë e zjarmi”, në librin "Muzat i bien lyrës", Edicioni i revistës "Fidani", Prizren, 2005.
16. “Lulëkuqet e Vërrinit”, poezi, botoi shtëpia botuese “Metafora”, Zvicër, 2005.
17. Zana në mërgim, poezi për fëmijë, ”Metafora”, Zvicër, 2006.
18. Huqet e Benit, poezi për fëmijë, ”Metafora”, Zvicër, 2006.
19. Bosi lepurushi, fabula, ”Metafora”, Zvicër, 2006.
20. Gjëegjeza, ”Metafora”, Zvicër, 2006.
21. Dita me Tonin (Poemë), ”Metafora”, Zvicër, 2006.
22. Muajt e vitit me Ardin (Poemë), ”Metafora”, Zvicër, 2006.
23. “Dallëndyshja në Vërri” (poezi për fëmijë), ”Metafora”, Prizren, 2007;
24. “Kroi i qytetit tim”, (poezi për fëmijë), ”Metafora”, Prizren, 2007;
25. “Masakra e Tuzsuzit”, Monografi, (bashkautorësi), „Metafora“, Prizren, 2007,
26. “Degë e thyer”, poezi, “Metafora”, Prizren, 2007.
27. “Misioni i kriminelit”, roman, “Metafora”, Prizren, 2008

Etj.