Isa Mustafa e Hashim Thaçi, dashuri në kohën e COVIDIT 19

Isa Mustafa na tha dje se për shkak të refuzimit të Albin Kurtit që ta heqë pa kushte tarifën ndaj Serbisë, ka vendosur ta rrëzojë “ qeverinë e shpresës”.

Sot, u dakordua për mocionin e mosbesimit me Ramush Haradinajn, mbështetësin e flaktë të mbajtjes së tarifës 100 për qind deri në njohjen nga Serbia.

Kaq sa i takon, hipokrizisë së radhës të liderit të LDK-së.

Prishja e koalicionit nuk është fundi i botës, por jo në këto rrethana emergjente, kur bota është në luftë me një virus të padukshëm, që ka shkaktuar pandemi, vdekje, izolim të popujve dhe dëme të jashtëzakonshme ekonomike.

Sinkronizimi i Lidhjes Demokratike me Hashim Thaçin dhe PDK-në, është veprimi më i rrezikshëm që kanë mundur të bëjnë, në kohën kur Kosova kërcënohet nga një marrëveshje e dëmshme, që parasheh ndarjen e territorit.



Qeveria Kurti shumëkujt po i pengonte, përfshirë edhe disa struktura të LDK-së, të mësuara me zhvatje e privilegje. Vetëm për kaq pak kohë, kjo qeveri ndali abuzime të shumta në sektorin publik, ndërsa qartazi vuri në rrezik bizneset e politikanëve të PAN-it dhe asaj pjesë të LDK-së, që bashkëjeton me PAN-in.

Prandaj, duhej gjetur një arsye e pavërtetë-tarifa-për t’i dhënë fund koalicionit në kulmin e një krize që nuk i dihet fundi. Fundja, tarifa ishte përgjegjësi direkte e kryeministrit. LDK si parti e dytë, pse duhej të shqetësohej aq shumë? Apo kishte hallin se mos po e gjen gjë Hashim Thaçin…



Isa Mustafa u mundua të sillej si një kryeministër paralel. Të dërguarit e tij në qeveri, Avdullah Hoti e Agim Veliu që prej ditës së parë kërcënonin që do të dilnin duke u thirrur në raportet me SHBA-në.

LDK-ja vetë e votoi programin e qeverisë që parashihte shfuqizimin e tarifës dhe zëvendësimin e saj me reciprocitet ndaj Serbisë. Këtë plan e kishin pasur edhe në fushatën zgjedhore. Kështu edhe ishin marrë vesh me VV-në kur negocionin programin bashkëqeverisës.



Por, ç’ndodhi ditët e fundit, pasi Hashim Thaçit iu ngushtua dukshëm rrethi i veprimit?

Mustafa sërish e sfidoi partnerin e tij, kryeministrin Kurti. Duke dërguar Skënder Hysenin në zyrën e Grënellit në SHBA, ai e goditi sërish qeverinë që ironikisht thoshte se e mbështeste.

Sinkronizimi i liderit të LDK-së me presidentin Thaçi, arriti kulmin me rastin e gjëndjes së jashtëzakonshme. Nga zyra e tij në parti, Mustafa vlerësoi në koordinim me Thaçin se duhet të shpallet gjendja e jashtëzakonshme. Pa asnjë argument bindës. Këshilli i Sigurisë u shpreh kundër.

Por me rëndësi, ishte për Mustafën ta nxirrte Kurtin para aktit të kryer. Në politikë duhen kapërdirë ca gjëra, por për një politikan si Albin Kurti, poshtrimi dhe nënshtrimi nuk janë të pranueshëm.

Vulën këtij skenari thaçian të zbatuar nga Mustafa&CO, ia vuri ministri i brendshëm Agim Veliu, një politikan sharlatan dhe i papërgjegjshëm që përhapi panik duke thënë se çdo orë rastet me koronavirus po shtoheshin!!

Asnjë rast që prej deklaratës së tij nuk u shënua në Kosovë për fat të mirë.

Por, për fat të keq, Kosova sërish po hyn në një krizë të re politike, ku ata që e kapë shtetin për dy dekada, në emër të partneritetit me Amerikën, duan të na fyejnë sërish, për ta marrë në mënyrë antikushtetuese pushtetin.



Autorët e këtij puçi në kohën e pandemisë, e dinë se kurdo që të vijnë zgjedhjet, debakli është i pashmangshëm për ta.

Me gjasë, edhe kryeministri, e ka nuhatur një gjë të tillë dhe në vend që të përpiqet ta shuajë zjarrin e ndezur nga Hashim Thaçi e partnerët e tij, ia hodhi edhe ky ca pika benzinë.