Arbana Xhara:Tempulli i analfabetëve

Me automatizëm kërkojnë të regjistrohen në universitet, madje me dhunë, kërcënim dhe frikësim të rektorit. Nuk është ky standard i sotëm që po kërkohet të instalohet, ai ekziston tash e 15 vjet në Kosovë. Në emër të luftës, fillimisht morën institucionet në duar, më pas secilin sektor kyç të vendit, pozitat më të rëndësishme, vazhduan me tenderët publikë, nisën me krijimin e kompanive të rrugëve me nga një lopatë për të përfituar milionat, (ishte më e lehtë për të ardhur deri te paraja e shtetit). Për të mos numëruar me qindra e qindra variante që janë shfrytëzuar dhe po vazhdojnë për të plaçkitur Kosovën. Në emër të luftës e fëlliqën vendin për më shumë se një dekadë.

E gjithë ky denigrim u zhvillua përpara syve të atyre që luftuan përnjëmend, që e ëndërruan një Kosovë të lirë me tërësinë e saj territoriale dhe mbi të gjitha një shtet ligjor. Ata që ofruan jetën të gatshëm për të mos e duruar padrejtësinë, nuk u pasuruan në kurriz të popullit, por u harruan (sa prej tyre kanë kryer vetëvrasje nga skamja). Ata ngelën të papërkrahur, të bindur se luftëtari i denjë nuk mund ta plaçkitë popullin e vet. Ata nuk e duan një Kosovë të kapur nga bandat.

Këta që e denigruan Kosovën e kanë kaluar fazën e fuqisë financiare, atyre tash u duhet intelekti. Kanë arritur të bëhen edhe pjesë e diplomacisë kosovare. P.sh Ramiz Lladrovci na përfaqëson si ambasador në Shqipëri, e kategorisë se tillë i duhet një trohë intelekt. Pra, dikush nëpër ambasada e dikush nëpër ministri dhe institucione të tjera... Por fillimisht kanë nevojë të marrin një diplomë që t’u shërbejë si lustër e injorancës që kanë. Dhe pse jo dikush prej tyre të vazhdojë me jetën akademike si “ish-ministri i marrës”, Bujar Dugolli. I dyshuar disa herë për manipulim në procesin e privatizimit, sot është dekan në Fakultetin Filozofik. Ai u bë magjistër dhe doktor i shkencës brenda natës dhe me shumë kompetencë del e flet për tempullin e dijes.

Kolegu i tij Ethem Çeku, ish-ministër i Energjetikës, i cili në një pyetje timen për keqpërdorim me tokat e Sibovcit, disa vjet më parë, më ishte përgjigjur: “tokat e lucit tam”. Po ky i njëjti, sot është dekan në Fakultetin e Edukimit, synon edukimin e gjeneratave. Bajram Kosumi, një ish-politikan i kategorisë së analfabetëve funksionalë, udhëheq me departamentin e gazetarisë në UP.

Duke qenë dëshmitarë të këtyre “vlerave” mbi të cilat është ndërtuar çdo segment në vendin tonë, pse të mos besojnë edhe ata studentë potencialë që pa meritë ta kenë të drejtën të avancohen dhe pse jo pas disa vitesh të bëhen pjesë e strukturave udhëheqëse. Duke parë këtë denigrim të përmasave marramendëse, arsyetohen edhe kërkesat e protestës, sepse ky tashmë është normalitet në Kosovë.

Për t’u përballur me këtë kategori që është në gjendje të shkelë edhe mbi vlerat e luftës për interesa personale, dorën në zemër se ka aspak të lehtë rektori.

Prandaj sot është momenti i fundit që t’u thuhet stop matrapazëve që njollosin luftën e UÇK-së e që në emër të saj e kanë kapur shtetin, dhe t’i japim mbështetje rektorit Ramadan Zejnullahu.