Vatra e re e koronavirusit në Tiranë, Bardh Spahia bën deklaratën e fortë dhe ‘i përvishet’ keq Ramës: Qeveria i mbajti hapur që të mos mbulonte pagat e tyre!

Ish-deputeti i PD Bardh Spahia ka reaguar pas shpërthimit të një vatre infeksioni me koronavirus në një ‘call center’ në Tiranë.

Spahia thotë se ashtu si fasonët edhe ky sektor u lanë hapur vetëm që qeveria të mos mbulonte asnjë qindarkë nga pagat e tyre.

Ai kujton paralajmërimin e opozitës që në fillim të pandemisë për rrezikun që vjen nga këto dy sektorë të ekonomisë

“25 të infektuar të rinj me Covid-19 të publikuar sot janë ilustrimi kokëfortë i dështimit të qeverisë në marrjen e masave për të mbrojtur shëndetin e qytetarëve. Shumica e tyre, 15, janë të rinj që punojnë në call center. Është e njëjta vatër e rrezikshme si fasonët, që u lanë të hapura vetëm e vetëm që qeveria të mos mbulonte asnjë qindarkë pagat e tyre.

Ne e kemi thënë me zë të lartë që në fillim se fasonët dhe call centers janë 2 vatra të mëdha rreziku, pasi infektimi përcillet masivisht tek familjarët e të njohurit! Ato nuk u ndihmuan me asnjë qindarkë nga qeveria, duke i lënë në vështirësi serioze financiare e sidomos duke rrezikuar shëndetin!

Kjo nuk është thjesht papërgjegjëshmëri, pasi vatra të tilla janë kthyer në fakt kokëfortë të politikës kriminale në një situatë pandemie, ku shëndeti i qytetarëve duhet të jetë i pari.

Edi Rama do të mbetet në histori si inividi që shfrytëzoi një pandemi për të fituar përmes tenderash sekretë e me cmime stratosferike, që dha fare pak lëmoshë si kompensim për shkatërrimin ekonomik që i solli biznesit e familjeve shqiptare, e sidomos me makutërinë për të mos kompensuar sipërmarrje si call centerat apo fasonët, që u kthyen në vatra të rrezikshme infektimi me Covid-19″, shkruan Spahia.