Ish-Guvernatori i Bankës së Shqipërisë, Ardian Fullani padit Kuvendin dhe BSH për shkarkim të padrejtë nga detyra

Ish-Guvernatori i Bankës së Shqipërisë, Ardian Fullani ka paditur në Gjykatën Administrative Kuvendin dhe Bankën e Shqipërisë, për shkarkimin në mënyrë të padrejtë nga detyra. Ish-Guvernatori drejtoi Bankën e Shqipërisë për rreth 10 vjet, deri në momentin që u arrestua teksa po dilte nga zyra e tij. Më pas ishte Këshilli Mbikqyrës i BSH-së dhe Kuvendi i Shqipërisë që ndërmori hapat për shkarkimin e Fullanit nga detyra e Guvernatorit.


Gjykata e Tiranës shpalli të pafajshëm ish-guvernatorin e Bankës Së Shqipërisë Ardian Fullani.

Ish-guvernatori Fullani akuzohej për shpërdorim detyre për vjedhjen e 713 milionë lekëve, i njohur ndryshe si skandali i vjedhjes së Thesarit. Fullani u arrestua me urdhër të Prokurorisë, por fitoi lirinë nga Gjykata e Apelit.

Ardian Fullani është zgjedhur Guvernator i Bankës së Shqipërisë në tetor të vitit 2004 dhe është rizgjedhur në nëntort të vitit 2011 duke zëvendësuar në këtë detyrë Shkëlqim Canin.

Ardian Fullani është guvernatori i gjashtë i sistemit pluralist (Banka e Shqipërisë është krijuar më 4 tetor të vitit 1913). 

Ardian Fullani është diplomuar në Fakultetin Ekonomik, Dega Financë dhe në Fakultetin Juridik, pranë Universitetit të Tiranës, përkatësisht në vitin 1977 dhe në vitin 1991.

Fullani ka qenë pjesë e administratës së Bankës së Shqipërisë që prej vitit 1985 (atëherë Banka e Shtetit Shqiptar). Më pas në periudhën 1987 - 1990 kishte detyrën e zv.dfrejtorit të Departamentit të Jashtëm.

Fillimi i punës së z. Ardian Fullani në fushën e bankingut qendror i takon vitit 1992, në funksionin e Zëvendësguvernatorit të Bankës së Shqipërisë e në vijim në periudhën 1993-1996, si Drejtor i Departamentit të Jashtëm. 

Fullani ka mbajtur edhe funksionet e Presidentit të Shoqatës Shqiptare të Bankave, të Institutit të Studimeve e Asistencës Bankare si dhe të Komisionerit në Komisionin e Letrave me Vlerë.

Fullani mban titullin "Commendatore dell'Ordine della Stella della solidarietà italiana/ Urdhri i Yllit të solidaritetit italian", i akorduar nga Presidenti i Republikës së Italisë.