Cikë poetik nga Engjëll Koliqi
Engjëll Koliqi është i lindur më 10 nëntor 1956, në Stubëll të Vitisë në Kosovë. Shkollën fillore tetëvjeçare e ka mbaruar në vendlindje, gjimnazin – drejtimin e shkencave natyrore/matematikore në Viti dhe në Ferizaj. Në Universitetin e Kosovës në Prishtinë ka mbaruar fakultetin e edukimit dhe ka marrë titullin akademik: profesor i pedagogjisë.
Tetë vjet ka punuar në vendlindje, si mësimdhënës e edukator. I ndjekur nga regjimi okupues i Beogradit, pasi më parë edhe ishte arrestuar, në mars 1990 është detyruar të largohet nga vendlindja dhe shkon në Itali, ku edhe sot jeton e vepron me familjen e tij. Që nga fillimi ka punuar gazetar dhe redaktor në Radio Vatikan, korrespondent i radiotelevizionit shqiptar – RTSH në Tiranë e pastaj i radiotelevizionit të Kosovës – RTK në Prishtinë. Ka punuar edhe për radiotelevizionin publik të Maqedonisë, si dhe për radiotelevizione të tjera private në gjuhën shqipe. Mbi 20 vite shkruan në shtypin e përditshëm dhe atë periodik shqiptar – në Kosovë, në Shqipëri, në Maqedoni, në Mal të Zi dhe në diasporë. Më së shumti ka shkruar në gazetat: Rilindja, Bujku, Bota Sot, Lajm Ekskluzive, Pavarësia News, Koha Jonë, Rilindja Demokratike, Panorama, Shekulli etj. Ka bashkëpunuar edhe me gazetat italiane – Corriere della Sera, La Repubblica, Il Messaggero, La Stampa, Il Mattino, Resegone, L’Avvenire, Famiglia Cristiana etj. Poashtu ka bashkëpunuar edhe me dy qendrat kreyesore radiotelevizive italiane – RAI dhe MEDIASET
Mbi 30 vite është marrë me organizimin e shoqatave atdhetare, kulturore, artistike dhe humanitare. Në politikë nuk është angazhuar as aktivizuar në asnjë parti, edhepse bashkëpunon me të gjitha palët e politikës shqiptare, në Kosovë dhe në viset tjera shqiptare. Është i akredituar nga Qeveria e Kosovës, si gazetar dhe veprimtar në Itali.
Përveç artikujve gazetaresk dhe shkrimeve publicistike, ka botuar edhe qindëra poezi, nëpër gazeta e revista shqiptare. Në italisht ka botuar përmbledhjet me poezi “Il mio secolo si chiama amore” (Shekulli im quhet dashuri), si finalist i konkursit ndërkombëtar “Autorët për Europën 2005” , në Shtëpinë Botuese IBISKOS, në Empoli, si dhe përmbledhjen tjetër voluminoze, prej 161 poezishë, me titull “Sentimento di luce” (Ndjenjë drite), më 2007, nga Shtëpia Botuese BOOPEN, në Napoli. I njëjti libër, në gjuhën portugeze, me titull “Sentimento de luz” është botuar nga Shtëpia Botuese PROTEXTO, në Curitiba (kryeqytet i shtetit Paraná, në Brazil). Ndërkaq në vitin 2008, Shtëpia Botuese O LUTADOR në Belo Horizonte (kryeqytet i shtetit Minas Gerais, në Brazil), ka botuar librin e këtij autori “Madre Teresa – um amor sem limites” (Nënë Tereza – një dashuri e pakufijshme), me parathënien e Hirësisë së Tij – Kardinalit Serafim Fernandes Araújo dhe është pritur jashtëzakonisht mirë nga lexuesit dhe nga kritika. Që të dy librat, në gjuhën portugeze i janë përkthyer nga Profesoresha e mirënjohur Dr Vera Lúcia Alves Neves. Në vitin 2009 shkrimtari Baki Ymeri ia ka bërë një përzgjedhje poezishë, ia ka përkthyer rumanisht dhe ia ka botuar në Bukuresht, në shtator, librin poetik me titull “Să schimbăm lumea cu iubire” (Ta ndërrojmë botën me dashuri), për të cilin libër kanë shkruar kritikë letrarë të atjeshëm shumë pozitivisht. Shqip ka botuar librin “Ylli i Dardanisë rrezaton tokë e qiell” kushtuar Nënë Terezës, që këto ditë doli nga shtypi edhe në gjuhën italiane, dhe po përkthehet edhe në disa gjuhë botërore. Në Tiranë, shtëpia botuese Glolus R, ia ka botuar librin poetik “Trokitje të heshtura”, në gushtin e kaluar. Ka në dorëshkrimmedhe libra të tjerë, që besojmë së shpejti do e shohin dritën e botimit. Ai po punon edhe bër botimin e dy/tre librave të tjerë, në gjuhën amtare.
Në janar të vitit 2009 pati një aksident të tmerrshëm automobilistik në Slloveni dhe mbas mbi pesë javë në gjendje koma, falënderojmë Zotin që dëgjoi dhe përfilli lutjet e shumë dashamirësve, e ringjalli mrekullisht dhe po e merr vetin ngadalë, por sigurtë. Nga ky autor mund të presim edhe shumë tituj e shumë libra të tjerë, sepse nuk pranë kurrë së shkruari, me penën e tij mjaft të mprehtë e të ëmbël.
ME SYRIN E ARSYES
Përcjellim çdo lëvizje
Dhe dyshojmë...
Kemi kujdes
Dhe mbrohemi
Nga mëkatet stinore
Stubëll, 25 mars 2011
ME RITËM DASHURIE
Marshojmë shtigjeve të pranverës
Me të bukurat këngë
Të krenarisë
Shijojmë bashkë
Amshimin e lumturisë
Stubëll, 25 mars 2011
PLOT E PËRPLOT
Në stinën tonë të pestë
Plot akte dashurie
Në amshim
Përplot kënaqësi
Unë me mbretëreshën
Jemi të stërmbushur
Me frymë mirësie
-
Gëzuar!
Stubëll, 25 mars 2011
KUR NDJEHET NEVOJA
Me mbretëreshën time
Ëmbëlsojmë të gjitha relievet
Dhe të gjitha stinët
Me akte të bekuara
Të dashurisë
Dhe të mirësisë
Stubëll, 25 mars 2011
NERVOZIZMI
Për çdo dështim
Dhe për çdo gabim
Shumë njerëz
I kapë mërzia
Nevrikosen
Dhe humben
Në rrugët e jetës
Plot sfida
Plot stres
...
Stubëll, 25 mars 2011
HERËT
Të mos ngutemi
O zanë e pranverës sime
Ende është herët
Dhe s’ka arritur
E tërë ngrohtësia
E kënaqësisë
Çdo gjë
Në çastin e duhur!
Stubëll, 25 mars 2011
SHOHIM E BËJMË
Nëse jemi gjetur rastësisht
Oj e bukura e dheut
Dashurinë e kemi
Me plot sinqeritet
-
Shohim e bëjmë
Konkretisht
Aktet e kënaqësisë
I realizojmë
Viti, 25 mars 2011
ME GURËT E SË VËRTETËS
Kudo në mbretërinë tonë
Ndërtojmë mure
Dhe kështjella dashurie
Viti, 25 mars 2011
UNË EDHE TI
Nisemi bashkë
Dhe marshojmë
Shtigjeve të dashurisë
Deri në amshim
Viti, 25 mars 2011
JETA IME
O dashuria ime e parë
Sot e tutje
Do të quaj jetë
Sepse më ke ringjallë
Në stinën e pestë
Më ke dhuruar plot mrekulli
Me mjalt dashurie
-
Gëzuar dashuri
Gëzuar jetë!
Viti, 25 mars 2011
NË RRETHANA TË REJA
Duhet të bëhemi të ëmbël
Të vlefshëm
E të dashur për të gjithë
Elastikë dhe të qëndrueshëm
Në secilën stinë
Viti, 25 mars 2011
NË STUBËLL
Ndjehem më i fortë
Më i sigurtë
...
Shpirti më mbushet
Plot me kujtime
Dhe me dashuri
...
Këtu gufon
Jetë emocionesh
Dhe krenari
Viti, 25 mars 2011
