Arben Kondi, 8 vepra kushtuar Çamërisë dhe Kosovës

Në vijim të “Javës së Historisë dhe Kulturës së Çamërisë” promovohet në Ministrinë e Turizmit, Kulturës, Rinisë dhe Sporteve korpusi letrar me 8 vepra i shkrimtarit Arben Kondi, kushtuar Çamërisë dhe Kosovës. Në fjalën përshëndetëse, kryetari i PDIU-së, z. Shpëtim Idrizi theksoi se shqiptarët e Çamërisë dhe të Kosovës, si dy pjesët e kombit shqiptar që kanë pësuar më shumë goditje nga historia, janë motor lëvizës i kombit tonë. “Në kuadër të ‘Javës së Kulturës dhe Historisë së Çamërisë’, në Ministrinë e Kulturës po promovohet një kolanë, e cila bashkon dy pjesë të kombit shqiptar, që së bashku kanë vuajtur dhe janë syrgjynosur, shqiptarët e Çamërisë dhe shqiptarët e Kosovës. Më lejoni që të falenderoj shqiptarët e Kosovës për mbështetjen e vazhdueshme ndaj një prej çështjeve më të pazgjidhura kombëtare, çështjes çame”, – tha Idrizi. Në korpusin e Kondit renden: “Djaj në Veladon”, “Barbarët”, “Rikthim në Çamëri”, apo “Tmerri”, i cili është botuar ditët e fundit. Krijimtarinë letrare dhe publicistike të Kondit e vlerësoi edhe aktori Reshat Arbana, i pranishëm në takim.