Të paktën një komando terroriste duket se ka arritur të largohet pas atentateve në Paris.
Dy ditë pas atentateve të përgjakshme në Paris është gjetur një veturë e zezë e markës Seat. Këtë veturë atentatorët mendohet se e kanë përdorur në sulmet e tyre ndaj kafeneve dhe restoranteve. Automjeti u gjet në periferinë lindore të Parisit, Montreuil dhe në të ndodheshin disa kalashnikovë. Armë si këto i patën përdorur atentatorët në Paris.
Prokurori i Parisit, François Molins bëri të ditur se sipas dëshmitarëve sulmuesit patën përdorur një Seat të zi, kur hapën zjarr të premten në orën 21:32 në një bar në Rue de Fontaine au Roi dhe në orën 21:36 në një restorant në Rue de Charonne
Sipas vlerësimit të policisë, gjetja e veturës do të thotë se njëra nga të tri komandat terroriste ka arritur të largohet, siç bëri të ditur televizioni Europe 1. E paqartë mbetet nëse dorasit vazhdojnë të jenë në arrati apo nëse janë ata që u arrestuan të shtunën në Belgjikë. Atje, në një bastisje të policisë në lagjen e migrantëve të Brukselit Molenbeek u arrestuan disa vetë. Njëri prej tyre besohet se të premten në darkë ka qenë në Paris.
I pari që u identifikua nga atentatorët ishte 29 vjeçari Omar Ismail Mostefai. I riu i lindur në jug të Parisit ka qenë disa herë i dënuar për vepra të ndryshme penale dhe kishte rënë në sy për shkak të radikalizimit të tij, deklaroi prokuroria. Babai dhe vëllai i tij u morën në arrest të shtunën në mbrëmje. Veç babait dhe një vëllai u arrestua edhe gruaja e tij. Veç kësaj u bastisën banesat e tyre. Hetuesit bënë të ditur se është e zakonshme në rastë të tilla, që të afërmit të kalojnë në paraburgim, për t'u marrë në pyetje. Vëllai 34 vjeçar tha se nuk ka pasur prej kohësh kontakt me Mostafein.
