( Dëshmori i kombit, Ismet Qorraj )
Vatër e ndezura n`prushërim shekujsh të krrusur
nuk shuhet dot nga erë e acartë dimri t`ciknosur
ngrohtësi shpirtin n`lashtësi legjendash mbushur
furtunës n`përflakje përcëllimi gjoksin shpalosur
*
Katranosur zijoshët, marshojnë lemerishëm
ktjelltësinë mynxyrshëm e qëllojnë vetëtima
n`sokëllima egërsisht, n`vërshuarje furishëm
shkrepash varur mnershëm, me hungërima
*
Tërbim hienash n`ulërimë çjerrëse trollit i sulen
rrufe goditëse pamshirshëm zbrazen qiellit t`nxirë
toka rënkonte, n`përballje trimëritë s`përkulen
n`errësirë humnerash s`qëndron dot shpirti i lirë
*
Nëpër mote kalitur n`ideale t`zjarrta që s`tunden
n`flakërima kalëruar rrëmbyeshëm Ismet trimi
lukuni barbarësh ta çrrënjosin dot nuk munden
nga rrënjët ngulitur n`thellësi, del llavë mallkimi
*
Radhët shtërnguar n`marshime lirie krenarë
n`balada t`lashta himne madhështisë kënduar
kokën lartë patrembur nga pancir e hanxharë
prinë Ismet Qorraj me flamurshkabën valuar
*
Syrin shqiponjë, vrullshëm errësirën përballur
plumbat sfiduar me zemrën valë në afshërime
hero Ismeti, me zvarranikë t`helmatisjes tallur
me tyta t`barbarisë të harbuara në shfrenime
*
N`shtatore simbol, ndër shtigje ndriçon fanar
ndrinë n`kujtime breznishë, obelisk lartësuar
rrezëllime përjetësisht n`horizonte shpërndarë
shpirt vetmohimi n`altar pavdekësie nderuar…
(Xheladin A. Çitaku, lindi më 29.03.1960 në fshatin Bajçinë - Besianë. Mbaruar shkollën fillimisht në fshat, të mesmen, Gjimnazin në Besianë, Fakultetin Filologjik, dega Letërsi e Gjuhë shqipe, në Universitetin e Prishtinës. Punon si arkivist në administratën e Asamblesë komunale në Besianë.)
