Ministri Genc Pollo dhe Drejtori i Misionit
të USAID në Shqipëri, z. Xhozef Uilliams morën pjesë në fillimin e
Programit, të mbështetur nga USAID, për Sigurinë Kibernetike në
Shqipëri, një nismë njëvjeçare që do të ndihmojë në ngritjen e
kapaciteteve të qeverisë shqiptare për të parandaluar dhe reaguar ndaj
incidenteve kibernetike.
Gjatë
ceremonisë Ministri Pollo tha ndër të tjera: “Në vendin tonë, në pesë
vitet e fundit, projekti Shqipëria Digjitale ka hedhur hapa të
rëndësishëm madje ka transformuar mënyrën e të vepruarit në shumë
sektorë. Janë jo të pakta agjencitë shtetërore që ndërveprojnë me
zyrtarët, klientët apo publikun e gjerë përmes website-eve e portaleve
interaktive. Edhe ne kemi regjistruar sulme ndaj website-eve, duke
filluar me ato të hacker-ave të thjeshtë, që në të shumtën e rasteve
janë të rinj me dhunti teknike dhe intelektuale si dhe me karakter
rebel. Por të mos harrojmë që ka edhe agresorë më seriozë se ata, të
cilët mund të kenë pasoja serioze, si për shtetin ashtu edhe për
organizata jo shtetërore, në rast se nuk u kushtohet vëmendje.
Kohët
e fundit SHBA, sipas doktrinës së mbrojtjes kibernetike, ka deklaruar
se, nëse i nënshtrohet një sulmi të tillë, do të ruajë të drejtën për tu
përgjigjur me një sulm ushtarak konvencional. Për tu siguruar edhe ne,
për të ndërtuar edhe ne mbrojtjen kibernetike në Shqipëri,
institucionet, rregullat, procedurat, infrastrukturën përkatëse, po
bashkëpunojmë me një universitet amerikan, më të njohurin në këtë fushë
Carnegie Mellon, që për çështje të tilla është ndër partnerët e
qeverisë së SHBA-ve; një bashkëpunim i cili na u mundësua nga USAID,
drejtori në vendin tonë, z. Xhozef Uilliams, i cili si zakonisht iu
përgjigj kërkesës sime specifike jo vetëm pozitivisht por edhe në një
kohë të shkurtër, duke bërë të mundur fillimin e këtij projekti kaq të
rëndësishëm dhe që unë besoj se do të jetë i suksesshëm.”
Në
vijim të kësaj ceremonie, ekspertë nga Software Engineering Insitute
(SEI) të Universitetit “Carnegie Mellon” do të zhvillojnë një workshop
njëjavor për të ndihmuar institucionet qeveritare dhe joqeveritare të
kuptojnë modelet e sigurisë kibernetike, të përfitojnë aftësi dhe të
zhvillojnë procedura për t’u rezistuar dhe për të menaxhuar incidentet e
sigurisë kibernetike.
Pjesëmarrësit
në program do të jenë përfaqësues të Agjencisë Kombëtare për Shoqërinë e
Informacionit (AKSHI) dhe specialistë të teknologjisë së informacionit
nga institucione të ndryshme qeveritare, përfshirë Policinë e Shtetit,
Prokurorinë e Përgjithshme, Komisionerin për Mbrojtjen e të Dhënave
Personale, etj.
Gjatë periudhës
Shtator 2011 – Mars 2012, SEI do të zhvilojë një sërë workshopesh që do
të përcjellin për institucionet shqiptare metodat dhe njohuritë e
nevojshme për të ngritur strukturën për sigurinë kibernetike, që do të
mbrojë Shqipërinë nga kërcënimet kibernetike që vijnë nga katastrofat
natyrore apo sulmet kibernetike. Temat e workshopeve do të përfshijnë
planifikimin dhe zbatimin e strategjive, modelet, afatet kohore, burimet
e nevojshme, grumbullimin e raporteve për incidentet kibernetike,
ngritjen dhe mirëmbajtjen e një baze të dhënash për incidentet e
sigurisë, shërbimet e paralajmërimit, publikimin e rolit të strukturës
në fjalë dhe lidhjet me organziata të ngjashme të sigurisë kibernetike.
Prej
disa vjetësh, teknologjitë e informacionit dhe komunikimit (TIK) kanë
qenë pjesë integrale e planifikimit të USAID në Shqipëri. Vitin e
fundit, USAID ka kryer një vlerësim gjithëpërfshirës për sektorin e TIK
në Shqipëri. Ky vlerësim konfirmoi rëndësinë dhe ndikimin që kanë
zgjidhjet e IT për çështje të transparencës dhe mirëqeverisjes, në
veçanti për reformat e e-qeverisjes të zbatuar në kuadër të Programit i
Pragut të Korparatë për Sfidat e Mijëvjeçarit.
