SPARTAKËT E KËSAJ KOHE




Vullnet Mato
 
SPARTAKËT E KËSAJ KOHE
 
Spartaku zgjidhi skllevërit 
dhe u priu në gërxhet e lirisë,
duke i këputur çdo skllavi 
zinxhirin e çeliktë të shfrytëzimit.
La për të gjitha kohërat 
në kujtesën e historisë,
britmën kryengritëse, 
kundër shtypjes dhe mjerimit.
 
Sa keq të bëhesh sot skllav  
me zinxhir te këmbët,
për mitingje e protesta 
si numër i shumësit aritmetik;   
me shpërblimin mizerabël, 
sa për të mprehur dhëmbët, 
të ndërsehesh kundër skllevërve 
kundërshtarë në politikë!...
 
Spartaku u ndriçoi njerëzve 
rrugën e kohës së vërbër.
Por ndodh njerëzit e kësaj kohe, 
verbohen nga spartakët karieristë,
pranojnë imponimin, 
apo premtimin e gënjeshtërt,
të mbushin sheshet me turma skllevërish 
pa britmën e protestës në shpirt. 
 
Unë për veten time, 
skllav nuk do të bëhesha kurrë.
Zinxhirët i këputa bashkë
me kërthizën nga barku i nënës.
Por në dalsha në shesh, 
me shokët e gjakut të ndezur furrë,
do i bie kambanës së qiellit 
me batoqin e hënës;
 
Derisa klithmat të çojnë nga varri 
vetë Spartakun e lashtë. 
Të vërë rregull me burra kombëtar 
që i duhen Shqpërisë.
Kalamajtë grindavecë të tribunave, 
që tundin shkopinjtë e lëmit me kashtë, 
t’i shpjerë prapë te nënat,
t’i vënë nga e para në sisë…

Comments

Popular posts from this blog

Libra të rinj - Shkarkim falas

Ese për Vitin e Ri

Poezi të zgjedhura nga GJERGJ FISHTA (23 tetor 1870 - 30 dhjetor 1940)