Në Kosovë shumë lehtë mund të fusin mallra që afati i qëndrueshmërisë u skadon pas një dite, edhe kur ndodh një gjë e tillë nuk ndëshkohet importuesi, sepse nuk ka ligj që e rregullon këtë çështje.
Si rezultat, konsumatorët përballen me rrezikun nga prodhimet e dyshimta, të cilat hiqen nga vendet ku prodhohen, për t’u shitur në Kosovë pa problem.
Mosangazhimin institucional e dëshmon më së miri fakti se në departamentin për mbrojtjen e konsumatorit pranë Ministrisë së Tregtisë dhe Industrisë është i punësuar vetëm një punëtor.
Arta Istrefi, këshilltare për media e ministres së Tregtisë dhe Industrisë, thotë se me ristrukturimin e brendshëm të MTI-së është paraparë themelimi i Departamentit të Mbrojtjes së Konsumatorit.
“Derisa tani kemi vetëm një zyrtar për mbrojtën e konsumatorit, që është në kuadër të Divizionit për Tregun e Brendshëm, me aprovimin e strukturimit të MTI-së do të shtohen edhe 2 persona të tjerë. Pra, Departamenti i Mbrojtjes së Konsumatorit do t’i ketë 3 persona”, tha ajo.
Sipas saj, Ministria e Tregtisë dhe Industrisë është duke punuar në ngritjen e vetëdijes së konsumatorit, me qëllim të rritjes së raportimit për padrejtësitë me të cilat ata përballen në treg. Ajo tha se deri më tani janë mbajtur një mori ligjëratash në Universitetin e Prishtinës, por edhe në universitetet private.
Istrefi tha se gjithashtu, MTI-ja ka shpërndarë broshura si dhe pankarta të vendosura nëpër Kosovë që të gjithë konsumatorët mund të thërrasin pa pagesë në numrin e tel. për të raportuar për ndonjë parregullsi të mundshme.
Zyrtarët e Agjencisë së Veterinës dhe Ushqimit të Kosovës (AVUK) kanë thënë se nuk ka asnjë bazë ligjore që e kufizon kohën e afatit të qëndrueshmërisë së një produkti ushqimor me rastin e importit.
“Produkti në ditën që importohet duhet të ketë afat qëndrueshmërie, por nuk është i përcaktuar afati minimal kohor se sa duhet të ketë afat qëndrueshmërie, por ekziston koordinim i inspektoratit kufitar dhe atij të brendshëm për përcjelljen e produkteve, qe importohen me afat të shkurtër përdorimi”, ka thënë Lamir Thaçi, AVUK.
Istrefi tha se numri i ankesave nuk është i kënaqshëm, përkundër fushatave të vazhdueshme për ngritjen e vetëdijes për mbrojtjen e konsumatorit.
“Deri më tani kemi afërsisht 90 ankesa, ku shumica e ankesave kanë të bëjnë me rregullatorin e Ujësjellësit, KEK-un, skadim të afateve të produkteve të ndryshme, faturim i padrejtë apo mospërfillje të garancionit. Rastet të cilat kanë qenë të lidhura me Inspektoratin e Tregut janë zgjidhur 100% në favor të konsumatorit”, tha ajo.
