Shënim: Ergysi, UÇK-ja dhe disa grekë të lodhur dhe dritëshkurtër

Publikimi i një fotoje në facebook me bluzën ku duket qartë logoja e UÇK-së, ja ka komplikuar seriozisht jetën futbollistit të Paok-ut të Selanikut dhe kombëtares shqiptare, Ergys Kaçe. Ekipi e pezulloi nga aktiviteti sportive dhe një komision disiplinor u mblodh enkas për këtë rast që shkaktoi reagime të forta në gjithë Greqinë. Po përse këto reagime? Mendja ta do që lidhja bëhet me UÇK-në si “organizatë terroriste”, (paçka se partitë e dala nga ushtria çlirimtare janë në pushtet në Kosovë dhe dialoguese me Athinen zyrtare), dhe sidomos me ofendimin e vëllezërve ortodoksë serbë. Kaçe është detyruar të kërkojë falje për gjestin (foton e hodhi një shok I tij në fb, jo ai vetë) dhe deklaroi se “Paok më ka ndihmuar jashtë mase, më ka ndryshuar jetën mua dhe familjes dhe nuk dua që për shkakun tim të komentohet negativisht”. Dhe më tej,ka deklaruar se nuk e dinte se çfarë ishte UÇK-ja. “Bluzën e vesha sepse pashë që ishte flamuri shqiptar dhe nuk më shkoi në mendje se do të shkaktonte këtë reagim në Greqi. Po ta dija nuk do ta vishja, pasi këtu jetoj, këtu jam rritur, këtu shkova në shkollë dhe këtu është atdheu im i dytë”, ka thënë futbollisti.

Këto tërheqje të djalit të shkretë, padyshim të detyruara dhe të instruktuara, megjithatë duket qartë se nuk shkuan deri tek prekja e flamurit të atdheut të tij, pasi në të kundërt në Greqi do kishte edhe një lloj tjetër reagimi, ai i shqiptarëve. Por le të mbetemi tek vëllazëria serbe. Publiku grek e di fare mirë se një grupim vullnetarësh të armatosur grekë që sot më së shumti militojnë tek Agimi i Artë, kanë marrë pjesë dhe janë shquar në masakrën famëkeqe të Srebrenicës. E pohon këtë dhe gazetari e publicisti i njohur Takis Mihas. Por nuk është ndjerë ndonjëri për këtë fakt tashmë të vjetër dhe të stërnjohur. Disa pjesë të publikut dhe opinionit grek i shqetëson më shumë një logo ushtrie që ka mbrojtur atdheun e vet.