,,Kryengritja e Dervish Carës”

Në amfiteatrin e Rektoratit të USHT-së, sot u promovua libri “Kryengritja e Dervish Carës”, i akademikut Aleksandar Matkovskit, përkthyer në gjuhën shqipe nga profesori i USHT-së, Fatmir Sulejmani dhe i botuar nga ShB ,,Brezi 9”.

Në promovimin e kësaj vepre të rëndësishme për historiografinë shqiptare, merrnin pjesë drejtuesit e USHT-së, akademikët shqiptarë të ASHAM-it, ambasadori i Republikës së Shqipërisë në Maqedoni, Arben Çejku, bashkëshortja e akademikut të ndjerë Aleksandar Matkovski dhe mysafirë të shumtë.

Rektori i USHT-së, Vullnet Ameti, duke i përshëndetur të pranishmit, theksoi se në angazhimet dhe veprimtarinë mësimore-shkencore libri ka qenë dhe mbetet një ndër shtyllat kryesore në veprimtarinë e Universitetit tonë. “Vetëm gjatë këtij viti kemi promovuar disa tituj librash po në këto ambiente, të autorëve të ndryshëm dhe nga fusha të ndryshme. Sot kemi rastin të jemi pjesëmarrës në një ngjarje kulturore pak sa më të veçantë, sepse bëhet fjalë për një libër i cili trajton një nga periudhat më të bujshme të historisë sonë kombëtare, dhe për një ngjarje për të cilën është shkruar dhe diskutuar shumë pak në historiografinë tonë”, tha në mes tjerash rektori i USHT-së, Vullnet Ameti, duke e përgëzuar me këtë rast profesorin Fatmir Sulejmani për përkthimin, redaktimin dhe përgatitjet tjera për daljen në dritë të kësaj vepre.

Për rëndësinë e kësaj vepre, por edhe për veprimtarinë atdhetare të Dervish Carës, foli edhe ambasadori i Republikës së Shqipërisë në Maqedoni, Arben Çejku, i cili kryengritjen e këtij patrioti e vlerësoi si përpjekjen më të madhe çlirimtare të shqiptarëve, në shekullin XIX.

Ndërkohë, bashkëshortja e akademik Aleksandër Matkovskit, Poliksena Matkovska, falënderoi auditorin për nderin që i bëhet bashkëshortit të saj, duke e promovuar njërën prej veprave të tij kryesore, të ripërkthyer dhe plotësuar nga Fatmir Sulejmani.

Për veprën “Kryengritja e Dervish Carës”, folën studiuesit, Fehari Ramadani, Prorektor për arsim i USHT-së, Memli Krasniqi, nga Instituti Albanologjik i Prishtinës dhe magjistri i Historisë, Ilir Memeti.

Kryengritja e Dervish Carës konsiderohet si përpjekja e parë, kur në vitin 1843 -1844 për trojet shqiptare u kërkua autonomi nga Perandoria Osmane.