Shkruan Prof.Dr.sci.Eshref Ymeri
Në
faqen e internetit të “Agjencionit
Floripress” të moderatorit të mirënjohur Flori Bruqi, të datës 21 shtator
2013, është botuar një analizë interesante e Prof.dr. Mehdi Hysenit, me titull:
“Ideja për një “Jugosllavi të re” në Ballkan është pordhë
e ftohtë e Serbisë së Madhe!!!”
Pse Nostalgjia për YU-në?!!!
Në këtë analizë, profesori
i nderuar nacionalist citon një deklaratë befasuese që Ministri i Mbrojtjes së Republikës
së Kosovës, Agim Çeku, e ka lëshuar në
një intervistë që i paska dhënë gazetës serbe të Beogradit “Nedeljnik”, më datën
18 prill 2013.
Ja çfarë paska deklaruar
ministri Çeku:
“Podržavam ideju nove Jugoslavije”(E mbështes idenë e
Jugosllavisë së re”).
Kjo është një deklaratë sa
e turpshme, aq edhe skandaloze që një politikan i lartë i Republikës së Kosovës
ia jep gazetës së një vendi armik, siç ka qenë dhe vazhdon të mbetet Serbia millosheviçiane
për mbarë kombin shqiptar.
Me këtë deklaratë, ministri Agim Çeku i ka çjerrë
maskën vetes përfundimisht, dhe, në sytë e kombit shqiptar, ai ka zbuluar fytyrën
e tij të vërtetë prej shërbëtori të Beogradit dhe prej adhuruesi të fshehtë të
titizmit në radhët e UÇK-së, dje, në kohën e luftës, dhe, sot, në krye të
Ministrisë së Mbrojtjes të Republikës së Kosovës.
Ideja e krijimit të Jugosllavisë
së Re ka kohë që ka qarkulluar në fshehtësi në Boegrad, nën frymëzimin e Moskës
dhe të Athinës.
Kjo ide erdhi e u formësua pas shpalljes së pavarësisë së Kosovës,
e cila shënoi hapin e parë drejt ribashkimit shkallë-shkallë të trojeve etnike
shqiptare, në zbatim të platformës që shtroi Ismail Qemali me shpalljen e pavarësisë
së Shqipërisë për të katër vilajetet tona.
Dështimi shembullor që pësoi
politika e jashtme ruse për sabotimin e pavarësisë së Kosovës, e detyroi
Kremlinin që, në bashkëpunim të ngushtë me Beogradin dhe me Athinën, të lëvizë
të tjerë gurë të nëndheshëm, në mënyrë që imazhi i pavarësisë së Kosovës të vijë
duke u zbehur me kalimin e viteve. Prandaj, në prapaskenë, u hartua projekti për
krijimin e Jugosllavisë së Re, i cili s’është gjë tjetër, veçse vënie në jetë e
programit “Naçertanie” të Ilia Garashaninit (1812-1874) të vitit 1844, kur ai
ishte ministër i jashtëm i Serbisë dhe më pas kryeministër dhe ministër i jashtëm
për shumë vite me radhë, program ky, sipas të cilit duhej të krijohej Serbia e
Madhe.
Por, për t’i hedhur hi syve
opinionit publik ndërkombëtar, trekëndëshi djallëzor Moskë-Athinë-Beograd, me qëllim
që ta nxjerrë të larë Serbinë nga ky pazar i fëlliqur, vendosi të futë në lojë
mikroshtetin që quhet Mali i Zi, i cili shtroi propozimin që, në kuadër të
zhvillimit të punimeve të Asamblesë së Përgjithshme të Organizatës së Kombeve të
Bashkuara në Nju Jork, të organizohet një takim i ministrave të jashtëm të
gjashtë vendeve të Ballkanit Perëndimor - Serbisë, Shqipërisë, Kosovës,
Maqedonisë, Malit të Zi dhe Bosnjë-Hercegovinës - për të diskutuar idenë e
krijimit të një bashkimi (unioni) të ri, të quajtur Jugosllavia e Re.
Propozimi i Malit të Zi për
krijimin e një strukture të re federative me emrin Jugosllavi e Re, të kujton fjalën e urtë të gjuhës shqipe: çohu, o i vdekur, të hashë mish të pjekur.
Me sa duket, pas fjalimit të
Kryeministrit Berisha më 25 nëntor 2012 në Shkup, në kuadrin e festimeve të
100-vjetorit të pavarësisë, i cili deklaroi se “bashkimi kombëtar mbetet një ëndërr për të gjithë shqiptarët”,
trekëndëshi Moskë-Athinë-Beograd vendosi të ndërmarrë aksione konkrete, duke i
kërkuar Malit të Zi t’i zbulojë letrat e bixhozit politik në tryezën e pazarllëqeve
evropiane, të cilave kombi shqiptar ua ka parë sherrin që prej Kongresit famëkeq
të Berlinit e deri në ditët tona.
Përveç kësaj, tendencat
nacionaliste që u vunë re me rastin e 100 vjetorit të pavarësisë, me pikësynim
ribashkimin perspektiv të trojeve tona etnike në një shtet të vetëm kombëtar,
krijuan shqetësime edhe në radhët e Bashkimit Evropian. Aq më tepër kur nisma e
liderit të Listës për Shqipërinë Natyrale Prof.dr. Koço Danaj, pati mjaft jehonë
në Austri dhe në Gjermani.
Prandaj nisma e Malit të
Zi, e nxitur nga trekëndëshi ortodoks sllavogrek, vështirë se mund të jetë ndërmarrë
edhe pa miratimin e heshtur të Brukselit, i cili, me krijimin e Jugosllavisë së
Re, kërkon të rikthejë vitin 1919, kur Evropa Perëndimore krijoi mbretërinë
serbo-kroato-sllovene. Me krijimin e Jugosllavisë së Re, Brukseli do t’u vinte
në osh epsheve shoviniste të sllavogrekëve, do të vendoste hegjemoninë serbe në
Ballkanin Perëndimor dhe do të varroste përfundimisht ëndrrën e shqiptarëve për
ribashkim kombëtar. Prandaj jo rastësisht shteti hajdut i huadhënësve evropianë
me emrin Greqi, vazhdon të mos e njohë pavarësinë e Kosovës, pavarësi kjo, që,
sipas trekëndëshit sllavogrek, do të vijë duke u venitur në kuadrin e të
ashtuquajturës Jugosllavi e Re.
Të gjitha shtetet e lartpërmendura
sllave mund të bien në një mendje për krijimin e Jugosllavisë së Re. Por etnia
shqiptare nuk duhet të pranojë kurrsesi të futet nën një sundim të ri sllav.
Pranimi i ombrellës sllave do të ishte një akt i tradhtisë së lartë kombëtare
nga ana e klasës politike shqiptare në trekëndëshin Tiranë-Prishtinë-Shkup. Por
deklarata e ministrit Çeku në gazetën beogradase, dëshmon se ajo nuk është një
deklaratë personale. Çeku është ministër i qeverisë Thaçi dhe prapa deklaratës
së tij fshihet pozicionimi i qeverisë së Thaçit, fshihet tradhtia e Thaçit ndaj
interesave jetike të Republikës së Kosovës. Tradhtinë e Thaçit ndaj Republikës
së Kosovës e vërteton fakti që në fletët e votimit për zgjedhjet vendore në
Kosovë që do të zhvillohen në muajin nëntor, nuk do të figurojë shenja dalluese
(logoja) e Republikës së Kosovës.
Dhe Thaçi, me dredhitë e tij karakteristike,
deklaron se shenja dalluese në fletët e votimit
na qenka në dorën e Komisionit Qëndror të Zgjedhjeve për t’u vendosur
dhe jo në dorën e qeverisë!!! Thaçi është bërë mbrojtje e fortë e shovinistëve
serbë të Mitrovicës Veriore, të cilët gjatë viteve të luftës u bënë mbështetje
e fuqishme e bandave kriminale të Millosheviçit për masakrimin e popullit
shqiptar të Kosovës, kurse tani nuk pranojnë ta njohin pavarësinë e saj.
S’është i rastësishëm qëndrimi tolerues i Thaçit ndaj shovinistëve serbë të
Mitrovicës Veriore, të cilët po shkojnë drejt shpalljes së autonomisë dhe
shkëputjes përfundimtare nga Republika e Kosovës. Me sa duket, nuk paskan qenë
pa gjë ato llafet që dikur kanë pas qarkulluar në Tiranë për figurën e dyshimtë
të Thaçit, i cili, kur në Kosovë derdhej gjaku i trimave të UÇK-së, gjente kohë
për t’u çlodhur në hotelin Rogner në Tiranë.
Nëse klasa politike
shqiptare, në trekëndëshin Tiranë-Prishtinë-Shkup, jep pëlqimin për të hyrë nën
ombrellën e Jugosllavisë së Re, atëherë kjo do të thotë se ajo vazhdon të ndjekë
traditën e politikës tradhtare të Enver Hoxhës, i cili, duke shpifur në emër të
popullit shqiptar, në një letër vetëposhtëruese që i dërgonte mareshalit Tito në mars të vitit 1948,
shkruante:
“Shoku Marshall,
…Populli ynë është aq i lidhur shpirtërisht dhe
ekonomikisht me popujt e Jugosllavisë sa asnjë popull tjetër dhe ky bashkim
s’ka asgjë formale, por ndihet thellë në zemrat e popullit tonë. Ne duhet të
punojmë konkretisht për Federatën [Jugosllave] dhe për këtë gjë në vendin tonë
punohet me të gjitha forcat… Ne kemi bindjen se, si kurdoherë, Komiteti Central
i Jugosllavisë do të na sqarojë dhe do të na këshillojë hapat dhe shoqërisht
mbi këtë çështje të rëndësishme për të dy vendet tona.
Pranoni të falat e mia më të nxehta shoqërore.
Enver Hoxha
Tiranë, 17 mars 1948” (Nxjerrë nga AQSH, Fondi 14/AP, dosja 4, 1948. Citohet sipas: Vasfi
Baruti. “Enver Hoxha në optikë të re. Shtëpia
Botuese UEGEN. Tiranë, 2013, f. 207).
Tani është në dorën e
klasës politike të trekëndëshit të lartpërmendur shqiptar
se cilën rrugë do të zgjedhë: rrugën e tradhtisë kombëtare apo rrugën e
realizimit të aspiratës mbinjëshekullore të shqiptarëve të mbarë trojeve tona
etnike për ribashkim të tyre, në një shtet të vetëm kombëtar, me një stemë dhe
me një flamur, dhe mandej hyrjen në Bashkimin Evropian.
Intelektualët shqiptarë në
mbarë trojet tona etnike dhe sidomos dy akademitë e shkencave, në Tiranë dhe në
Prishtinë, duhet të ngrenë zërin e tyre të fuqishëm kundër deklaratës së
ministrit Agim Çeku, e cila, në të vërtetë, zbulon qëndrimin antikombëtar të
qeverisë Thaçi.
Eshref Ymeri
Santa Barbara, Kaliforni
26 shtator 2013
No comments:
Post a Comment