Aleanca për Ardhmërinë e Kosovës, së cilës i takonte dikur Agim Çeku nuk kishte qenë asnjëherë në dijeni se ky i fundit në kohën sa ishte kryeministër ishte pajtuar që Kosova të ketë parlament dy dhomësh, një për shqiptarët dhe një për serbët.
Ish-kryeministri i vendit, Agim Çeku, në kohën sa e udhëhiqte Qeverinë e Kosovës ishte pajtuar që Kosova të ketë Parlament Dydhomësh, njërën dhomë për deputetë serbë dhe tjetrën për deputetë shqiptarë.
Kështu thuhet në një kabllogram të Ambasadës Amerikane, botuar nga Vikileaks. Siç shkruan aty, ideja kishte ardhur nga këshilltari i tij serb joformal nga Kroacia, Milorad Pupovac, emri i të cilit është mbajtur fshehur nga kabineti i atëhershëm i Çekut.
“Propozimi nuk është ndryshe nga një Kongres mbarë serb, i cili në mënyrë diskrete është duke u organizuar të ndodhë në dhjetor nga deputeti (serb) i Kroacisë dhe këshilltari jo-formal i kryeministrit Çeku, Millorad Pupovac. Kryeministri Çeku së voni i kishte thënë ambasadorit të atëhershëm amerikan, Visner, se e përkrah planin e Pupovacit (këshilltarit të tij) si mënyrë për t’i integruar serbët, por ai deshi që kjo çështje të mbahet në një distancë diskrete, në mënyrë që të mos njolloset projekti”, thuhet në kabllogram.
