Rifunksionimi i “Schengen”, KE prezanton udhërrëfyesin

Komisioni Europian propozoi udhërrëfyesin e detajuar për vendet anëtare, që synon të kthejë në funksionim të plotë sistemin “Schengen” deri në fund të vitit.

“Ne po paraqesim një udhërrëfyes për të kthyer funksionimin normal të zonës “Schengen”, pa kontrolle të brendshme kufitare. Ndërkohë, kontrollet e veçanta e të përkohshme, që aktualisht po bëhen në 8 vende të zonës “Schengen”, janë në përputhje me rregullat, ndaj dhe ne nuk mund të harrojmë objektivin se, këto raste janë me të vërtetë të përkohshme dhe të jashtëzakonshme. Ata që duan të vijnë në Europë dhe kanë nevojë për mbrojtje ndërkombëtare, do ta kenë këtë. Të tjerët duhet të kthehen. Ky proces tashmë ka filluar. 300 njerëzit e parë u kthyen në Turqi, sepse ishin të parregullt këtu”, tha Dimitris Avramopoulos, Komisioner i BE-së për Migracionin e Çështjet e Brendshme.

Në prag të samitit të së hënës me Turqinë, si dhe atij europian që mbahet për dy javë, Komisioneri Avramopoulos u shpreh se “tashmë është koha për vendet anëtare, që për interesin e tyre të përbashkët, të ruajnë një prej arritjeve më të kurorëzuara të unionit”.