Zëvendëskryeministrja Tahiri tha se me Serbinë nuk po diskutohet sovraniteti. Por, deputeti Hamiti i quajti vjersha shpjegimet, duke thënë se në bisedimet me Serbinë gjithçka është politike Nga Faton Ismajli më 17 qershor 2011 në ora 10:04 Shefja e ekipit të Kosovës në dialogun Kosovë – Serbi, Edita Tahiri ka polemizuar të enjten në Kuvendin e Kosovës me deputetin e LDK’së Sabri Hamiti për temën e dialogut Kosovë – Serbi. Deputeti i LDK’së ka kërkuar nga zyrtarja qeveritare të sjellë në Kuvend platformën e dialogut dhe të tregojë se çfarë marrëveshjesh do të nënshkruajë Kosova me Serbinë. Ai ka thënë se ekziston rreziku që nga dialogu teknik të kalohet në politikë, derisa Qeverinë e ka akuzuar se po punon në bazë të perceptimeve e jo fakteve. “Sa i përket punës a bisedohet për tema politike - këto janë nuanca. Për mua të gjitha këto janë politike. Por ju po thoni që s`janë. Ky është problem i perceptimit. Me Serbinë asnjë temë që bisedohet sot, në gjendjen që jemi, s`mund të mos jetë politikë. Ky është perceptimi im”, ka vlerësuar Hamiti. Ka pasuar reagimi i Edita Tahirit, e cila ka vazhduar temën e perceptimit. “I nderuar deputet Hamiti, Qeveria e Republikës së Kosovës nuk punon mbi perceptime. Punon mbi dokumente themelore, njëri prej tyre është Rezoluta e Kuvendit të Kosovës. E dyta është platforma e Qeverisë së Republikës së Kosovës”, është përgjigjur Tahiri. “Qeveria punon mbi dokumente dhe mbi vullnetin e popullit të Kosovës”, ka thënë Tahiri. Megjithëkëtë, polemika ndërmjet dy zyrtarëve ka vazhduar. Sabri Hamiti ka përsëritur pyetjet në drejtim të Qeverisë. “Platforma për këto bisedime, a do të vijë në Parlament? A do të ketë marrëveshje që nuk do të nënshkruhen? A do të ketë marrëveshje që nuk do të jenë marrëveshje ndërkombëtare dhe kalohen pa 2/3 në Kuvend? Këto ishin pyetjet e mia fundamentale që nuk mora përgjigje”, ka insistuar deputeti i LDK’së. Edita Tahiri ka thënë se për Platformën e bisedimeve ka folur Hashim Thaçi në Kuvend, derisa për modelet e marrëveshjeve që do të arrihen në dialog ka paralajmëruar se do të sponsorizohen nga BE’ja. “Dialogu teknik ka origjinën te Rezoluta e Asamblesë së Përgjithshme të OKB’së dhe se kjo rezolutë kërkon që dialogu teknik të ndërmjetësohet nga BE. Është Bashkimi Europian ai i cili do të propozojë modalitetet e marrëveshjeve se çfarë do të jenë dhe mbi atë ne do të shqyrtojmë ato modalitete, dhe mbi atë vendim do t`ju njoftojmë”, është përgjigjur Tahiri. Shefja e ekipit të Kosovës ka vazhduar të thotë se në bisedimet me Serbinë nuk do të ketë tema që prekin sovranitetin, integritetin territorial dhe rregullimin e brendshëm. Kjo përgjigje e Tahirit nga Sabri Hamiti është quajtur vjershë, e cila recitohet tash e njëzet vite. “Pavarësia dhe sovraniteti, integriteti territorial dhe rregullimi i brendshëm nuk janë vargje”, ka thënë Tahiri, duke iu përgjigjur ish-kolegut partiak. Zëvendësja e Hashim Thaçit ka paralajmëruar se Qeveria do të merr masa të shpejta edhe sa i përket vendosjes së reciprocitetit ndaj Serbisë, nëse kjo e fundit bllokon marrëveshjen për tregti të lirë në BE.
