Lëndët e Zyrës së Prokurorit Disiplinor u hodhën poshtë në mënyrë selektive nga Këshilli Gjyqësor i Kosovës. KGJK-ja, e drejtuar nga Lirie Osmani, vendosi në mënyrë selektive që nëpërmjet një të ashtuquajturi “konkluzion” t’i hedhë poshtë dhe t’i mbyllë përfundimisht disa nga lëndët e dërguara nga ZPD-ja për marrjen e masave kundërt gjyqtarëve shkelës të ligjit.Dosjet e mbyllura të ish-gjyqtarëve pa procedim disiplinor gjatë vitit 2010 i përkasin Ymer Huruglicës, ish-kryetar i Gjykatës së Qarkut në Gjilan; Drita Hoxhës, ish-gjyqtare e Gjykatës së Qarkut në Prishtinë, dhe Suzana Rexhepagiqit, ish-gjyqtare në Gjykatën Komunale për Kundërvajtje në Pejë etj. Sipas një zyrtari të KGJK-së, për këtë çështje ka qenë në dijeni edhe kreu aktual i KGJK-së, Enver Peci, por ky i fundit nuk e ka ndërmarrë asnjë veprim.
Këshilli Gjyqësor i Kosovës, gjatë periudhës 2010- 2011, i ka hedhur poshtë me dhjetëra lëndë të Zyrës së Prokurorit Disiplinor, ku protagonistë ishin gjyqtarët e rajoneve të ndryshme, të cilët ishin gjetur me shkelje nga kjo zyrë. Me pretendimin se bëhet fjalë për lëndë të parashkruara, Këshilli Gjyqësor doli në mbrojtje të gjyqtarëve që e kishin shkelur ligjin.
Gjithçka ka ndodhur në periudhën kur Këshilli Gjyqësor drejtohej nga Lirie Osmani, e cila njëherësh ishte edhe pjesë e Komisionit Disiplinor, së bashku me Zhika Jokanoviqin, anëtarin aktual të Këshillit Gjyqësor, si dhe ish-anëtarin tjetër të KGJK-së, avokatin Bilagip Maznikar. Sipas burimeve të gazetës "Kosova Sot" brenda KGJK-së, skandali në këtë rast është përforcuar me hedhjen poshtë të lëndëve në mënyrë selektive.
Viti 2010 ishte viti i fillimit të emërimit dhe riemërimit të gjyqtarëve dhe prokurorëve. Gjithashtu, ishte viti ku u plotësua numri me anëtarët e fazës së dytë të Këshillit Gjyqësor të Kosovës, si dhe u miratua Ligji për gjykatat dhe Ligji për Këshillin Gjyqësor të Kosovës.
