Lëvizja Vetëvendosje, përmes një komunikate njoftoi për një kërcënim që i ka ndodhur aktivistës së saj, Nazlije Balaj.
Në njoftim thuhet se dje, më 20 mars, drejtuesja e Sekretariatit të Gruas Aktiviste të Lëvizjes Vetëvendosje!, Nazlie Balaj, ka marrë një letër kërcënuese në derën e banesës së saj, ku i thuhet "të mos mbrojë turpin, se e pret plumbi". Ky kërcënim vjen disa ditë pas paraqitjes në emisionin e RTK-së ‘"Në kërkim", ku tema e trajtuar ka pasur të bëjë me Projektligjin për ndryshimin dhe plotësimin e ligjit nr.04/L-054 për statusin dhe të drejtat e dëshmorëve, invalidëve, veteranëve, pjesëtarëve të Ushtrisë Çlirimtare të Kosovës, personave të dhunuar gjatë luftës, viktimave civile të luftës dhe familjeve të tyre si dhe me rastet e dhunës tanimë të dëshmuara dhe të mbledhura nga ajo dhe aktiviste të tjera.
Mesazhi kërcënues i kësaj letre ka për qëllim frikësimin e gjithë atyre që kanë ngritur zërin për këtë temë me këtë çështje dhe heshtjen e krimeve të Serbisë.
Këto kërcënime nuk do të na ndalin në përpjekjet tona për ta shtyrë çështjen përpara derisa kjo kategori e ndjeshme të trajtohet institucionalisht dhe të përfitojë të gjitha të drejtat dhe beneficionet nga ligji në fjalë.
Futja e kategorisë së personave të dhunuar gjatë luftës në ligj, do të kontribuonte në rehabilitimin e këtyre viktimave dhe do t’ua mundësonte qasjen në drejtësi.
Prandaj, kushdo që ka kryer këtë akt të shëmtuar të kërcënimit është dashakeqës ndaj kësaj kategorie dhe i kontribuon drejtpërdrejt fshehjes së krimeve ndaj popullatës civile.
Këto ditë, përveç seancës së 14 mars janë parë publikisht nga të njëjtët, deputetë të PDK-së të cilët e votuan kundër projektligjin, deklarime dhe konstatime që këmbëngulin në mospërkrahjen dhe kundërshtimin e projektligjit, këtë me argumente të cilat jo vetëm janë çnjerëzore por mbi të gjitha frymëzojnë në opinionin publik një linçim të ri ndaj viktimave.
I bëjmë thirrje qytetarëve në përgjithësi, aktivistëve të të drejtave të njeriut që të vazhdojmë pa u ndalur rrugën e përbashkët për gjetjen dhe vënien në vend të drejtësisë.
21 mars 2013
Lëvizja VETËVENDOSJE!
