Shkrimtarja nga Kosova Ilire Zajmi -Rugova është fituese e çmimit special “Ventennale”, për poezi në edicionin e 20 –të në konkursin ndërkombëtar, të Qendrës për të Rinj dhe poezi në Triuggio të Milanos, Itali.
Ceremonia e ndarjes së çmimeve do të bëhet më 5 qershor 2011.
Konkursi ndërkombëtar për krijimtari pranë Qendrës për të Rinj e poezi në Triuggio është themeluar në vitin 1990. Në këtë konkurs letrar marrin pjesë shkrimtarë nga Italia dhe vende të tjera të botës.
Shkrimtarja Ilire Zajmi është autore e katër veprave. Dy përmbledhjeve me poezi, “Këmbanat e mëngjesit” dhe “Baladë e bardhë”, romanit “Fashitja e ëndrrave rebele” dhe bashkëautore e librit publicistik “Një tren për Bllacë” (Un treno per Blace) me gazetarin italian Filippo Landi, botuar në vitin 1999 në Bari të Italisë.
Poezitë e saj janë përfshirë në disa antologji letrare në Kosovë dhe jashtë.
Poezitë e Ilires janë përkthyer në italisht, anglisht, rumunisht etj.
Ilire Zajmi gazetare pranë Radio Televizionit Publik RTK shqiptare nga Kosova. Lindur më 1971 në Prizren. Me profesion është juriste e diplomuar në Fakultetin Juridik të Universitetit të Prishtinës. Ka specializuar diplomacinë pranë Akademisë Diplomatike Shqiptare, Qendra Rajonale për Studime Politike e Diplomatike. Aktualisht është duke vijuar studimet për magjistraturë në degën e Gazetarisë dhe Komunikimeve Masive. Ka të botuar katër libra: Përmbledhjen me poezi “Këmbanat e mëngjesit”, Prishtinë (1991), romanin “Fashitja e ëndrrave rrebele” Prishtinë (1996), libri publicistik “Un treno per Blace” botuar në Itali (Molfetta – Bari 1999), përmbledhjen me poezi “Baladë e bardhë” Prishtinë 2000. Është bashkëautore në tre antologji: “Take të larta” botuar në Prishtinë në vitin 2002, në antologjinë “Gjuha e dashurisë poetike” botuar në Tiranë më 2006, dhe bashkëautore në antologjinë “Nënës” botuar në Tiranë 2007. Shkruan poezi, prozë si dhe merret me përkthime letrare nga gjuha angleze dhe italiane. Është anëtare e Shoqatës së Shkrimtarëve të Kosovës dhe e PEN qendrës. Një kohë të gjatë ka punuar si gazetare e redaktore e lajmeve në mediat e shkruara dhe në ato elektronike në Kosovë. Aktualisht punon në Radio Televizionin e Kosovës.
