S'ka gjë më të bukur në botë, kur Nënat shkruajnë për Nënën!

nga Beqir SINA, New York, SHBA


SOUTHERN Blvd. BRONX (NY): Kohë më parë në shtëpinë e Vatrës - Bronks - Nju Jork, "Bota e Gruas Shqiptare" perfaqesuar nga autoret e librit "Nenes" qe banojne ne Nju Jork, organizuan në bashkëpunim me Vatrën, mbasditen kulturore për promovomin e antologjisë së porsa botuar "Nëna", që u moderua nga Zj. Mimoza Dajci dhe Iliriana Sulkuqi. Nikoqirja e këtij takimi "Bota e Gruas Shqiptare" themeluar nga z. Merita Bajraktari McCormack, është një grup grash dhe vajzash shqiptare që komunikon në internet, dhe që ka nxjerre në dritë dhe frytet e kësaj lidhje me botimin e këtij libri, i cili, është një antologji modeste me krijime kushtuar Nënës nga 26 vajza dhe gra nga forumi virtual femëror mbarëshqiptar.

Në këtë aktivitet kulturor, i pari i këtij lloji mbajtur vitet e fundit në shtëpinë e Vatrës, në një mbasdite fort të këndshme dhe tejet gazmore, duke nderuar mbi të gjitha emrin e dashur të Nënës qe na lindi, krijimet e këtyre krijuesve shqiptare nga Shqipëria, Kosova, viset shqiptare e Diaspora, nën ngrohtësin e Vatrës famëmadhe, morën pjesë disa figura nga më eminentet e komunitetit, kryetari i Federatës PanShqiptare të Amerikës, z. Agim Karagjozi, Agim Rexhaj, Prof. Dr. Skënder Kodra, Ramiz Muja, Zef Përndocaj, Pashk Maksutaj e te tjerë. Morën pjesë: shkrimtarë të njohur, Naum Prifiti, Pëllumb Kulla, Tom Mrijaj e Gjeto Turmalaj. Artistët Xhuljeta Kulla, Justina Alijaj e Astrit Tota, Zoji Shyti, si dhe biznesmene të sukseshëm, prindër dhe fëmijë, studentë shqiptarë dhe shkrimtari e publicisti Agim Shehu me bashkëshorten nga Zvicra dhe shkrimtari Fazlli Haliti nga Lushnja.

Gjatë promovimit, më se 50 pjesmarrës të ardhur edhe nga vende të largëta të Amerikës, si Medije Vraniqi me të bijën Vanesa, nga Teksasi, e nga shtete të tjera, u diskutua edhe për sfidat e rastet e zhvillimit të këtyre promovimeve në komunitet. Tema kryesore e këtij promovimi ishte libri dhe "Nënes". Në fillim të fjalës së saj ideatorja e librit, zonja Merita Bajraktari iu falenderua VATRES që ua hapi derën dhe bashkëpunoi me gratë në këtë aktivitet. Më pas ajo falenderoi atoret e librit dhe falenderoi pjesmarrësit në tubim.

"Sekreti" i antologjisë se librit të "Bota e Gruas Shqiptare" "Nënës"
Më pasë ajo tha se si u bë libri "Nëna", si i lindi ideja... e tjera. Duke treguar momente që ajo kishte përjetuar me mungesën e vajzës së saj e cila ndodhej në Washington D.C në një aktivitet, të cilin e ka përshkruar bukur edhe gazeta "Illyria", ajo kishte ndjerë se duhej ti shkruhej Nënës së saj, t'i rrefente mbi brengen pohon ajo duke treguar sekretet e librit. E tek beja kështu, shprehet Bjaraktari ndjeva se edhe nëna ime kishte mall për mua fëmijen e saj dhe kështu më lindi ideja që ti shkruaja duke i kërkuar falje pse isha larguar... se doja ti thoja më fal dhe të kam kuptuar!

Pastaj rrefehet ajo mendova se sa vajza janë si unë të ikura larg dhe mbase ndjejnë njëlloj si unë, sikur të mblidheshin këto shrkime, do bëhej një libër për "Nënën". Thashë, ka pohuar ajo, se e hodha idenë për një libër të përbashkët në forum për të shprehur pikërisht atë ndjenjë që ne kemi për Nenat tona dhe ideja ime u përqafua dhe gjeta mbeshtetje absolute, pranojë ajo.

Gjithashtu, tregoi se si punuan ne grupin redaktor, shpejt e saktë dhe me efektivitet... Për këte ajo përdori edhe një metaforë kur tha se: "me nektarin qe po mbledh nga ju mbase bëjmë mjaltë më të mirë" - fjala për një libër tjetër. Bashkëpunimi me autorët ishte shumë i mirë, tha Bajraktari, të gjitha kontribuan me materiale dhe patëm sponsorë (John McCormack, Medije Vraniqi, Daniel Desmondy, Arlinda Gjaka). Në fund ajo ka falenderuar të madhin Dritëro Agolli për parathënien dhe me tutje falenderoi shtepinë Botuese Albin.

Diçka për antologjinë e librit të "Bota e Gruas Shqiptare" "Nënë"
Rreth kësaj teme sqaroi Mimoza Djaçi, njëra prej dy organizatoreve kryesore të këtij aktiviteti e cila ka citojë një njohje me librin nga Dr. Mirela Bogdani, bërë rreth botimit të ketij libri ku thuhej se "Sapo ka dalë nga shtypi libri me përmbledhje në prozë dhe poezi "Nënës". Libri është prodhim i shtëpisë botuese "ALBIN" Tiranë. Parathënia është shkruar nga Dritëro Agolli, kurse kopertina është realizuar nga Argetina Tanushi. Autoret e librit janë 26 vajza dhe gra, anetare të forumit femëror shqiptar "Bota e Gruas Shqiptare". Ky është një grup virtual femëror, krijuar për t'i shërbyer mbajtjes gjallë të traditës, identitetit dhe vlerave familjare e shoqërore, dhe trashëgimisë kulturore shqiptare. Fushat e angazhimit profesional të anëtareve janë multidimensionale, gjë që i bën diskutimet në këtë forum të larmishme dhe interesante.

Gjithashtu në këtë grup ka krijimtari të mirëfilltë letrare, si prozë, poezi dhe publicistikë. Kjo nuk është hera e parë që nga ky grup janë krijuar antologji. Themeluesja e këtij grupi, Merita Bajraktari McCormack, qe eshte dhe editore e librit, hodhi idenë e një libri të përbashkët te ketij grupi, e cila u perqafua nga shume anetare, te cilat jane krijuese. Forumi "Bota e Gruas Shqiptare" është i hapur për të gjitha gratë dhe vajzat shqiptare, ka thënë në mbyllje të fjalës së saj zonja Mimoza Dajçi.

Urime e përshëndetje:
Promovimin e përshëndeti zonja Iliriana Sulkuqi. Ajo në emër të organizatoreve, i Ju falemnderua për pjesmarrjen të gjithëve, dhe veçanërisht Federatës PanShqiptare të Amerikës VATRA. Në këtë falemnderim nuk mundem të lë pa përmendur, tha Sulkuqi, edhe ato 26 femra shqiptare nga të gjitha trojet etnike, Shqipëria e Diaspora, të cilat janë autore të kësaj antologjie. Sot, është një ditë speciale me një emërues të përbashkët, ku fjala Nënë! do të tingëllojë me nota thellësisht të forta, ka konkluduar Sulkuqi. Kryetari i Vatrës, Agim Karagjozi tha se: "Jemi shumë të gëzuar që shohim këtë aktivitet të organizohet në shtëpinë e Vatrës. Të faleminderojë për këtë të gjithë ato zonja që kontribuan për këtë takim. Kisha shumë dëshirë që këtë takim t'a përshëndes me një poezi kushtuar nënës sime. Poezia titullohet: "Erdhi lajmi".

Në vazhdim fjalën e mori edhe shkrimtari i mirënjohur Naum Prifti, tregoi në fund të fjalës së tij se çfarë i kishte bërë më përshtypje në këtë libër, të cilën ai e ka lexuar me vëmëndje të madhe.
Megjithëse kam pasur një farë paragjykimi për këto lloj antoligjie, tha ai disa nga antollogjit që kamë lexuar më parë më kanë diziluzjonuar, si ato për gruan, ushtrinë, për politikën e tjera të botuara në Shqipëri. Ky ishte një libër krejt i veçantë. Dhe titulli më i përshtatëshëm i tij do të kishte qënë "Nëna krijon për Nënën".

Njëra prej sponsorizuesve Medije Vraniqi, kujtoi me nostalgji babain e saj, që ai të ketë qenë njëri i pastër shpirtërisht e i ndershëm e patriot. Dhe ashtu babai i saj i ndjerë kishte edukuar e rritur edhe fëmijët. Edhe më vjen mirë shumë e ndjehem e emocionuar, tha ajo që jemi mbledhur këtu pa marrë parasysh se nga çfarë vendi jemi - vetëm se jemi shqiptarë dhe jemi në gjendje t'i tregojmë njëri tjetërit jemi të një gjaku."

Landa Prifti: Një nga redaktoret e librit shprehu emocionin e saj për këtë takim. Ajo i shprehu mirenjohje figurave pjësmarrese së bashku me nënën e saj, dhe tregoi se si u bë libri Nënës. Ajo shprehu mirenjohje bashkëautoreve dhe falenderoi Nënën e saj që ishte pjesmarrese ne ate takim. Landa kishte udhëtuar për shtatë orë nga Rochester,s bashku me Nënën dhe bashkëshortin, për të qënë e pranishme në këtë aktivitet. E ema e saj iu shprehu mirënjohje vajzave autore dhe tregoi emocionin e saj kur ky libër iu dhurua nga e bija. Ajo tregoi se ishte një nga surprizat më të bukura të jetës se saj.

Agim Shehu: Nëna dhe Vatra janë dy emëra që lidhen qysh me fëmijërin tonë. Kur kujtomë nënën kemi kujtuar edhe Vatrën. Nëna ne jep gji në fëmijëri Nëna është ajo që mbushte Vatrën me dru të ngroheshim. Vatra ngrohte. Prandaj edhe ky takim ka simbolikën e vetë në këtë këndëvështrim. Simbol harmonie e vitaliteti shqiptar. që çdo gjë kalon nëpërmjet Vatrës dhe Nënës.Faslli Haliti: Ndjeva një kënaqësi të veçantë që u bëra pjesëmarrës i këtij promovimi. Kjo është si një shkëndijë e cila do të nxisë edhe më shumë jo vetëm këto gra por edhe gra të tjera shqiptare të na sjellin edhe më shumë krijimtari letrare.

Pëllumb Kulla: Ky libër është "produkti" i një shoqërie grash shqiptare shumë të mira. Ky është zëri i këtyre grave që meriton përgëzimin tim. Më përpara kam njohur krijimtarinë e Mimozës, Ilirianën, Albanën, Leonorën dhe Meritën dhe besoj se do të kemi rast të njehmi edhe më shumë prej jush. Gjëja që unë dëshiroja të promovoja më shumë, ishte që të mos i jepja asaj fjalës dashuruar, nocionin lotë. Me të drejtë ndodh kur flasim për nënat që ne të përlotemi.

Eleonora Gjoka: Éshtë shumë bukur të shikosh produktin e mendimeve të tua, të shoqërisë rreth teje të cilat, shumicën nuk i ke takuar kurrë, veçse në internet. Por, ato i ndjen, vijnë pranë teje me botën e tyre të bukur, romantiko-melankolike, optimiste apo pesimiste sipas momentit. Duke marrë librin si një porosi magjike, se më erdhi në dorë po atë ditë që festonim ditën e saj, nis e çfletoj. Lexoj botën a gjithë tyre grave, vajzave tona, të shpërndara në gjithë botën, sikur lexoj vehten, po të njëjat ndjenja, shqetesime, dashuri, pendesa, betimi, malli, lotë, shtrengese zemre për nënën, për nënat tona.

Skenografi dhe piktori i mirënjohur Astrit Tota, është i mendimit se: "Jemi duke promovuar këtë libër në këtë Vatër të zjarrtë të shqiptarizmit, në një kohë kur ne shqiptarët po presim me padurim edhe vizitën e parë të një presidenti amerikan në Shqipëri. A thua se Presidenti Bush shkon në Tiranë, pyeti ai të shpallë edhe pavarësinë e Kosovës! Këtu, sot ne kemi një përzjerje ndjenjash të përbashkëta, të cilat, po na shkaktojnë edhe emocione të mëdha. Urojmë që në rrugën e krijimtarisë së këtyre grave të hecin edhe gratë e tjera shqiptare të na sjellin edhe antologji të tjera. Nuk ka më bukur se në "kopështin" e Vatrës ku lulëzuan Noli e Konica, të bëhet edhe ky promovim e këtij libri me emërin e dashur dhe të prekëshëm të Nënës.

Zoti Xhevdet Myteberi, përshëndeti në emër të shoqatës atdhetare kulturore "Devolli" dhe i uroi suksese autoreve. U lexuan edhe pjesë nga recencat dhe përshëndetjet e Riza Lahit dhe autoreve si Aida Dismondi, Argetina Tanushi, Raimonda Moisiu etj.
Si konkluzion:
Pejsë nga poezitë e këtij libri recitojë artistja e famëshme shqiptare Justina Aliaj. Gjithashtu Orsin Turmalaj lexoi poezi nga libri si dhe Astrit Tota. Dy vogëlushe ishin dhe supriza e këtij takimi ato recituan bukur dy poezi njëra për Nënë Terezen dhe tjetra për Nënën. Një koktej me ushqime të përgatitura nga amviset shqiptare, ishte mbyllja e këtij aktiviteti, i cili, ishte i pari që mbahej në shtëpinë e Vatrës. Nëpërmjet këtij aktiviteti këto gra u shprehën se ato do të zhvillojnë bashkëpunimin për të botuar së bashku vepra të tjera letrare, dhe, se do të rrisin bashkëpunimin me Vatrën. Në këtë këndëvështrim ato morën edhe premtimin solemn dhe përkrhajen të kryetarit të Vatrës, z Agim Karagjozi. i cili pasi urojë për suksesin, tha se: "Vatra e ka pasur gjithmonë dyert e hapura për të gjithë shqiptarët, e do t'i ketë gjithmonë të hapura, prandaj tha ai jeni më se të Mirëseardhura në shtëpinë e Vatrës".