Promovohet “Historia e Shteteve të Bashkuara të Amerikës”

Në Ministrinë e Turizmit Kulturës Rinise dhe Sporteve, me rastin e 235 vjetorit të Pavarësisë së SHBA-së u promovua libri “Historia e Shteteve të Bashkuara të Amerikës”, i përkthyer në shqip nga Ukë Zenel Buçpapaj dhe Adela Buçpapaj. Përkthyesi Buçpapaj u shpreh se tashmë që ky libër ka parë dritën e botimit i vjen mirë, që në emër të kombit të tij ka shprehur mirënjohjen e thellë për Shtetet e Bashkuara të Amerikës. Në promovimin e librit i pranishëm ishte edhe publicisti, Enver Bytyçi i cili e konsideroi librin “Historia e Shteteve të Bashkuara të Amerikës”, si libri e historisë së një kombi të ri dhe të vjetër njëkohësisht. Libri prezanton për lexuesit historinë e një shteti, si një rast shembull për vlerat civilizuese dhe jep mesazhin se janë parimet kushtetuese ato që e bëjnë një vend të qëndrueshëm. ‘Historia e Shteteve të Bashkuara të Amerikës’, një libër me rreth 450 faqe, përshkruan Amerikën e hershme, periudhën koloniale, rrugën drejt pavarësisë, formimin e qeverisë kombëtare, si dhe lulëzimin e SHBA-ve dhe depresionin e madh që e pasoi deri tek ngjarjet e shekullit XXI. Në promovimin e librit e pranishme ishte edhe përfaqësuesja e Zyrës së Marrëdhënieve me Publikun në Ambasadën Amerikane, Elizabeth Lewise e cila përshëndeti botimin e këtij libri në emër të Ambasadorit Amerikan në Shqipëri, Alexander Arvizu. “Historia e Shteteve të Bashkuara të Amerikës” vjen si një ribotim i Qendrës Ndërkombëtare të Kulturës.