Përkujtohet poeti Ndre Mjeda në përvjetorin e lindjes

Në kuadër të kremtimit të 100-vjetorit të Pavarësisë dhe shtetit shqiptar, komuna e Bushatit dhe qendra muzeore “Ndre Mjeda” organizuan dje në Kukël ditën përkujtimore të lindjes se poetit Mjeda (Mjeda lindi më 20 nëntor 1866 në Shkodër e vdiq më 1 gusht 1937). Në ketë manifestim morën pjesë personalitete të larta fetare, kulturore dhe politike të qytetit të Shkodrës, si kryetari i Konferencës Ipeshkvore të Shqipërisë, imzot Angelo Massafra, ambasadori i Britanisë së Madhe, Nicholas Cannon, konsulli i Nderit të Austrisë, Gjergj Leqezja, deputetë e nxënës shkollash. Së pari një homazh pranë shtatores së Mjedës, për të vijuar me fjalët e rastit nga kryetari i komunës se Bushatit Zef Hila, imzot Angelo Massafra, i cili ndau porosinë e letrës baritore të ipeshkvijve shqiptarë me rastin e 100-vjetorit të Pavarësisë, si dhe nga ambasadori Cannon, i cili shprehu kënaqësinë që pati rastin të vizitonte ambientet ku ka jetuar e punuar poeti i madh Ndre Mjeda. Në vazhdim, të pranishmit vizituan kishën e poetit Mjeda të ndërtuar në vitin 1913, si dhe shtëpinë-muze të themeluar qe në vitin 1962, e cila pret restaurimin e plotë të saj e, përveç saj, dhe tryeza 100-vjeçare e Mjedës, e cila ende gjendet në depot e Muzeut të Shkodrës.