Hysen KOSOVRASTI, lindi në Dibër të Madhe, në vitin 1943.
Shkollimin fillor dhe të mesëm i mbaroi në vendlindje.
Shkollën e Lartë Pedagogjike, degën Gjuhë-Letërsi Shqipe e kreu në Shkup, ndërsa Fakultetin Filozofik, Gjuhë e Letërsi Shqipe e kreu në Prishtinë.
Ka punuar, gjersa doli në pension, si arsimtar, drejtor shkolle dhe në ministrinë e Arsimit në Dibër.
Me shkrime merret që në moshë rinore. Ka botuar punime të ndryshme, gati, në të gjitha gazetat e revistat e kohës, si në Maqedoni, Kosovë e Shqipëri.
Në bashkautorësi me shkrimtarin Halit Basha, ka botuar librin-monografi “Dhjetë vjet të E.K.F në Dibër” dhe me Dr. Lutfi Turkeshin skenarin e dokumentarit televiziv “Pesha e fjalës më e rëndë se pesha e maleve”. “Të fala nga Amerika” është libri i tij i parë i botuar në 2005.
Librin “Mesazhe nga Amerika” e botoi në vitin 2010. Në këtë libër trajtohet jeta e mërgimtarëve shqiptarë me dhimbjet për rrugën që e morën, sidomos të rinjtë, për të filluar një jetë që as nuk u kishte shkuar ndër mend ndonjë herë, por ishin të detyruar nga shkaqet politike e më vonë edhe ato ekonomike.
Është marrë edhe me gazetari e publicistikë.
Është dalluar sidomos për reportazhet e tij, që i ka botuar në gazetën “Flaka”, “Rilindja”, “Shkëndia”, ”RD”, “Dibra”,
”Fakti” etj.
Ka fituar çmimin e dytë për reportazhe në gazetën “Dibra”.
Ka qenë bashkëpunëtor i Institutit të Folklorit në Shkup dhe Institutit Albanologjik të Prishtinës.
Eshtë anëtar i Akademisë Amerikano-Shqiptare të Shkencave dhe Arteve në SHBA, me seli në Nju Jork. Dy herë ka marrë certifikata si bashkëpunëtor i ASHASHA.Banon në Dibër të Madhe dhe SHBA.
No comments:
Post a Comment