Proza dhe poezia popullore para dixhitalizimit

Qindra mijë faqe prozë dhe vargje popullore shqiptare që gjenden në dorëshkrim në Arkivin e Institutit të Antropologjisë Kulturore dhe Studimeve të Artit, priten të hidhen në format dixhital. Përpara këtij procesi, studiuesve të Institutit u lind detyra të bëjnë katalogimin e kësaj pasurie folklorike. Studiuesit u mblodhën dje në hotel "Mondial" në një simpozium shkencor, nga i cili pritet një rezultat për skemën e kategorizimit të kësaj pasurie.


Agron Xhangolli, drejtor i Departamentit të Folklorit në Institutin e Antropologjisë Kulturore dhe Studimeve të Artit propozon një skemë sesi mund të katalogohet kjo pasuri. Te "Proza" bëjnë pjesë përrallat, legjendat, anekdota, trashëgimia popullore realiste, fjalët e urta, gjëegjëzat. Të Pasuria në vargje të kishte tri nëndarje themelore: epika, lirika, liriko-epika. Te epika, epika historike dhe legjendare.


Te lirika: Këngët e Punës, Këngët e Motmotit, Këngët e Lindjes e të Djepit, Këngët e Dasmës, Këngët e Synetit, Vajet, Këngët e Dashurisë, Këngët e Mërgimit. Te pasuria liriko-epike: baladat.


Studiuesja Miaser Dibra referoi për klasifikimin e baladave popullore, këngëve për fëmijë, këngëve të dashurisë, këngëve folklorike me temën e emigracionit; studiesja Afërdita Onuzi u ndal te klasifikimi i këngëve të festave kalendarike të motmotit, te këngët e punës, etj..


Të gjitha kumtesat, të botuara edhe në vëllimin "Klasifikimi dhe dixhitalizimi i Prozës dhe Poezisë Popullore Shqiptare", i paraqiten Këshillit Shkencor të Institutit, që vendos për skemën përfundimtare të katalogimit.


"Ky nuk është thjesht një proces për të ruajtur arkivat nga dëmtimet apo humbjet. Ne duam që me ruajtjen, të realizojmë paralel edhe klasifikimin", thotë Xhangolli për rëndësinë e procesit të dixhitalizimit.


Arkivi i Prozës dhe Poezisë Popullore përmban rreth 1.700.000 vargje, 10.000 proverba, 9000 faqe prozë (përralla, tregime, legjenda), si dhe mbi 100 volume të studiuesve që kanë mbledhur folklor gojor në terren.