Gjeneral Lleshi: Lufta Çlirimtare e Kosovës pjesë e arsenalit dhe thesar për Shqiptarinë.

 

Me rastin e trembëdhjetë vjetorit të rënies së luftëtarëve të UÇK-së,  Gjeneral major Ilir Konushevci dhe Dr. Hazir Malaj  në Qendrën e Kulturës, Medias dhe Botimeve të Mbrojtjes në Tiranë Akademia përkujtimore. Të pranishëm ishin Zëvendës Shefi i Shtabit të Përgjithshëm Gjeneral brigade Sandër Lleshi, Zëvendës Kryeministri i Kosovës Hajredin Kuqi, Shefi i Shtabit të Përgjithshëm të Forcave të Armatosura të Kosovës Gjeneral major Imbri Ilfezi, Kryetari i Këshillit për të Drejtat dhe Liritë e Njeriut Adem Demaçi si dhe përfaqësues të Ministrisë së Mbrojtjes, Forcave të Armatosura të Kosovës dhe Shqipërisë, familjarë, bashkëluftëtarë dhe njerëz të jetës politike e kulturore.
Tubimi në trembëdhjetë vjetorin e rënies së dëshmorëve u mbajt për të kujtuar dy nga  shtyllat kryesore të luftës çlirimtare, ideologët dhe veprimtarinë e denjë të çështjes Kombëtare të Kosovës, njerëzit e mëdhenj që i dhanë krahë të fortë luftës për çlirim, Ilir Konushefci dhe  Hazir Malën.

Në fjalën e tij përshëndetëse, Zëvendës Shefi i Shtabit të Përgjithshëm Gjeneral brigade Sandër Lleshi, theksoi se: “Me sakrificën e tyre dëshmorët realizuan një projekt të madh, atë që konsiderohej e pamundur prej shume kujt, realizuan një luftë e cila hyri në axhendën botërore dhe u bë fokus i përpjekjeve  ndërkombëtare. Me luftën e tyre  arritën të demonstrojnë një model të ri sjelljeje të shqiptarëve, t’i qëndrojnë larg krimit, madje duke e përballuar atë me mjaft sakrificë e dinjitet. Ata nuk e përlyen Flamurin Kombëtar, por ruajtën  integritetin shqiptar, duke i treguar të huajve se shqiptarët edhe luftën dinë ta bëjnë ndryshe, të pastër. Të gjitha  përpjekjet  që bëhen sot  nëpër kancelari apo korridore të ndryshme, janë të pasuksesshme. Çdo përpjekje që bëhet për ta njollosur sadopak sakrificën e madhe, heroizmin e jashtëzakonshëm të popullit shqiptar është e pasuksesshme për një fakt të thjeshtë se lufta çlirimtare e Kosovës ishte një luftë dinjitoze njerëzish që luftonin për liri duke respektuar të gjitha principet mbi të cilat zhvillohet lufta.” nënvizoi Gjeneral Lleshi.

Të pranishmit i përshëndeti edhe Shefi i Shtabit të Përgjithshëm të Forcave të Armatosura të Kosovës Gjeneral major Imbri Ilfezi i cili ndër të tjera theksoi se: “Çdo përvjetor na kthen mbrapa në histori për të kujtuar  dhe nderuar ata që nuk kursyen as jetën që ne të gjallët të jetojmë të lirë. Ky tubim përkujtimor na përkujton edhe një herë se sa e dhimbshme dhe njëkohësisht sa e rëndë  dhe e vështirë ka qenë përpjekja dhe lufta e gjatë për liri e popullit të Kosovës. Kjo përpjekje dhe luftë e vazhdueshme në situatën e shtypjes e vuajtjes të shekullit që lamë pas ka qenë pika që ka bashkuar të gjithë shqiptarët  kudo që ishin rreth çlirimit të Kosovës. Në besimin e plotë te liria dhe e drejta e popullit shqiptar të Kosovës për të qenë zot në shtetin e vet, Atdheut ju bënë fli shumë burra të mëdhenj. Lufta e fundit i futi në këtë radhë dhe luftëtarët e mëdhenj, strategun Ilir Kunoshevci dhe mjekun trim nga Tropoja Hazir Malaj, të cilët u shfaqën ndër figurat më të mëdha të luftës për liri të popullit të Kosovës. Figurat e të gjithë atyre që iu bënë themel shtetit tonë të ri, Republikës së Kosovës, janë përjetësuar sot dhe kanë zënë vend në kujtesën e kombit. Ata janë bërë pjesë e historisë sonë të re, pjesë e kujtimit që ndonjëherë edhe mund të na ligështojë, por që gjithmonë na jep forcë që të mos ndalemi asnjëherë së ndërtuari, përparuari dhe ruajturi shtetin që u krijua mbi kaq shumë sakrifica”, nënvizoi Gjeneral Ilfezi.

Në nder të luftëtarëve të lirisë, dëshmorët e kombit i përshëndeti edhe Zëvendës Kryeministri i Kosovës Hajredin Kuqi, i cili foli për veprimtarinë e Ilir Konushevcit dhe Hazir Malajt, për kontributin e tyre në përgatitjen dhe aftësimin e njësive të UÇK-së. Sipas tij vepra e madhe dhe sakrifica sublime e dëshmorëve të kombit është një udhërrëfyes për çdo veprim të institucioneve tona. Kujtimi për ta do të ketë kuptimin e plotë vetëm nëse Republika e Kosovës, ëndrra dhe synimi i tyre kulmor do të zhvillohet ashtu siç e kanë dëshiruar ata dhe siç e synojmë ne, vazhduesit e projektit për shtetin e ri, që synon zhvillimin dhe ecjen krah me botën e përparuar. Gjithashtu në këtë tubim e mbajti fjalën edhe Kryetari i Këshillit për të Drejtat dhe Liritë e Njeriut Adem Demaçi, ku sipas tij, aspirata e tyre ishte që Kosovën dhe Shqipërinë ta shihnin një. Ata ranë me këtë aspiratë dhe nuk e panë, por shpresoj që të jetë detyra jonë që ta mundësojmë atë. Në emër të familjes Malaj, foli  vëllai i dëshmorit, Z. Besim Malaj.

Në përfundim të akademisë përkujtimore, në nder të dëshmorëve të rënë për  liri dhe pavarësi, u organizua dhe një program muzikor me artistë të njohur nga Shqipëria dhe Kosova.