Automjeti i vjedhur në Zubin Potok identifikohet në Mitrovicë

 Zyrtarët policorë të stacionit policor ‘Jugu’ në Mitrovicë, identifikojnë një automjet të dyshuar, të raportuar si të vjedhur në Zubin Potok, në orët e hershme të mëngjesit.Automjeti, ”VW Golf-V”, pa targa të regjistrimit, ishte vërejtur i braktisur skaj rrugës afër varrezave të dëshmorëve në fshatin “Zhabar i Epër” në Mitrovicë, ndërsa policët kanë ndërmarrë veprimet e duhura operative për të siguruar të dhënat e automjetit të dyshuar.Pas veprimeve të para hetimore, është vërtetuar se automjeti “VW Golf” ishte automjeti i raportuar si i vjedhur në Zubin Potok,me 26 mars 2013, në orët e hershme të mëngjesit.Hetuesit policorë në Mitrovicë, kanë kontaktuar me hetuesit rajonalë të Drejtorisë Rajonale të Mitrovicës lidhur me identifikimin e rastit të automjetit të vjedhur, ndërsa automjeti i zbuluar është tërhequr nga vendi i ngjarjes deri në parkingun policor për procedurë të mëtejme.Prokurori publik i çështjes është informuar lidhur me rastin dhe veprimet e ndërmarra të policisë, ndërsa automjeti i raportuar si i vjedhur i është kthyer pronarit legjitim në Zubin Potok.Hetuesit policorë vazhdojnë hetimet e këtij rasti në kërkim të kryesve të këtij akti dhe sqarimit të rrethanave të raportuara.