Kosova, kjo histori suksesi

Drejtori i Iniciativës Evropiane për Stabilitet, Gerald Knaus, thotë se pyetja kryesore është se a do të jetë në gjendje Bashkimi Evropian ta bëjë më të qartë vizionin që, sikurse Serbia ashtu dhe Prishtina, do ta gjejnë në një të ardhme të afërt veten së bashku nën kulmin e përbashkët të integrimit evropian.

Në një intervistë për radion Evropa e Lirë, Knaus thotë se kjo është mënyra themelore për afrimin e Prishtinës dhe Beogradit dhe nëse ky vizion mund të bëhet i qartë nga ndërmjetësuesit evropianë, atëherë mund të dalë diçka nga ky dialog.

“Jo vetëm sa i përket atmosferës, por sa u përket rezultateve konkrete”, u shpreh Knaus.

I pyetur se cila është pikëpamja e tij për qëndrimet aktuale të Prishtinës dhe Beogradit në këtë dialog, ai ka deklaruar se çështja kryesore në këto bisedime është që negociatat, vërtet të rëndësishme, nuk po bëhen ndërmjet Prishtinës e Beogradit, por ndërmjet Bashkimit Evropian dhe secilës nga të dyja palët.

“Realisht, është Bashkimi Evropian ai që mund t’i ofrojë Serbisë diçka që është tërheqëse për të, si për shembull avancimi drejt anëtarësimit në BE, në rast se ajo dëshmon fleksibilitet në disa çështje që kanë të bëjnë me Kosovën”, thotë Knaus në këtë intervistë.

Sipas tij, i takon, po ashtu, Bashkimit Evropian që t’ia ofrojë Prishtinës dhe Qeverisë së Kosovës një perspektivë më konkrete nga ajo që ekziston aktualisht.

“Në njëfarë mënyrë, pyetja kryesore është se a do të jetë në gjendje Bashkimi Evropian ta bëjë më të qartë vizionin që, sikurse Serbia, ashtu dhe Prishtina, do ta gjejnë në një të ardhme të afërt veten së bashku nën kulmin e përbashkët të integrimit evropian”, shprehet Drejtori i Iniciativës Evropiane për Stabilitet.

Ai sqaron se kjo është mënyra themelore për afrimin e Prishtinës dhe Beogradit dhe nëse ky vizion mund të bëhet i qartë nga ndërmjetësuesit evropianë, atëherë mendon se mund të dalë diçka nga ky dialog - jo vetëm sa i përket atmosferës, por sa u përket rezultateve konkrete.

I pyetur nëse Prishtina është në pozicion për të pasur kërkesa konkrete ndaj BE-së lidhur me çështje të caktuara, si liberalizimi i vizave dhe të tjera, Knaus thotë se pyetja kryesore për kosovarët është se a do të ofrojë BE-ja një proces të anëtarësimit, i cili do të ishte neutral karshi statusit.

“Kjo, në parim, do të thotë se Kosova do të trajtohej si pjesë e ardhshme e Bashkimit Evropian. Për këtë gjë do të vendosej në të ardhmen e largët, por tani ajo do të trajtohej si pjesë e ardhme e BE-së, sikurse nga vendet që e kanë njohur pavarësinë e saj, ashtu dhe nga ato që nuk e kanë njohur atë. Kjo do të thotë, se në njëfarë mënyre, Kosova do të ishte e përfshirë në një proces të ekzaminimit të institucioneve, legjislacionit, ndërtimit të kapaciteteve - një proces të para-anëtarësimit, edhe pse nuk ka ndonjë marrëveshje lidhur me statusin e saj”, ka deklaruar ai.

Sipas tij, testi më i madh për këtë është çështja e vizave, sepse këtu statusi madje nuk është as problem legal.

“Tajvani ka negociuar liberalizimin e vizave me BE-në, edhe pse nuk është njohur nga dikush. Nëse BE-ja dëshiron të dërgojë një sinjal të fuqishëm e të besueshëm për qasjen e saj pragmatike, atëherë dhënia e një udhërrëfyesi për viza do t’i jepte me të vërtetë shumë energji procesit të bisedimeve me Serbinë”, thotë Knaus në këtë intervistë.

Ai shton se me këtë, do t’u tregohej kosovarëve që Bashkimi Evropian është vërtet në gjendje t’u ofrojë diçka që është ekonomikisht e rëndësishme dhe politikisht e kërkuar.

Sipas tij, në njëfarë mënyre, dialogu nuk do të duhej ndalur asnjëherë.Knaus mendon se Serbia e dhe Kosova, janë të interesuara të lëvizin drejt BE-së, në njëfarë mënyre.

“Pra, sikurse të gjithë fqinjët në Ballkan, ato duhet të nisin diskutimet mbi një varg çështjesh. Ekzistojnë, përveç mosmarrëveshjeve të thella lidhur me statusin, shumë çështje konkrete mbi kompromiset dhe zgjidhjet e së cilave, të dyja palët do të përfitonin”, sqaron ai.

”Vetëm në fushën ekonomike, Kosova është një treg potencial shumë i rëndësishëm për Serbinë. Sa më shumë që zhvillohet ekonomia e Kosovës, aq më shumë bëhet tërheqëse për kompani veçanërisht në lindje të Serbisë -që është një rajon ekonomikisht i brishtë. Pra, ka shumë përfitime reciproke nga këto raporte dhe të gjitha sferat shoqërore”, thotë Gerald Knaus.



Prof.dr.Jakup Krasniqi, kryetar i Kuvendit të Kosovës deklaroi sot se çdo gjë që është në dëm të tërësisë territoriale të Kosovës, do të jetë e papranueshme.

Deklarimi i tij bëhet vetëm një ditë pasi Grupi Ndërkombëtar i Krizave propozoi status special për veriun e Kosovës në shkëmbim të njohjes së pavarësisë së Kosovës nga Serbia.

Por sipas Krasniqit, Kosova ka bërë mjaft kompromise të dhimbshme deri më tani dhe se oferta e saj për serbët që jetojnë në Kosovë ka qenë oferta më e madhe e mundshme deri më tani.

“Një gjë dua them që institucionet e Kosovës, populli i Kosovës dhe politika në Kosovës, ka vënë një kompromis të dhimbshëm me dokumentin gjithëpërfshirës të presidentit Ahtisarit dhe konsiderojmë që oferta që i është bërë komunitetit serb në Kosovë me dokumentin e Ahtisarit dhe me Kushtetutën e tanishme të Republikës së Kosovës, është oferta më e madhe e mundshme”, tha Krasniqi pas mbledhjes së kryesisë së Kuvendit e cila vendosi që seanca e radhës ku do të diskutohet projekt-buxheti do të mbahet me 25 mars.

“Çdo gjë tjetër që shkon në dëmtimin e tërësisë territoriale të Kosovës, dhe çdo gjë tjetër që ndryshon rregullimin e brendshëm të Republikës së Kosovës të paraparë me Kushtetutë, për politikën në Kosovë dhe institucionet e Kosovës është dhe do të jetë e papranueshme”, është shprehur Krasniqi.

Ai ka përjashtuar mundësinë për devijim të dialogut Prishtinë-Beograd dhe për mundësinë që të ketë një propozim për rishikimin e kufijve.



Raportuesi i Këshillit të Evropës, Dick Marty, në një seancë të mbyllur para Komitetit për Politikë të Jashtme të Parlamentit Evropian, të mbajtur mbrëmë, lidhur me akuzat për tregti organesh në Kosovë dhe Shqipëri, të cilat spikatin në raportin e tij të miratuar nga Asambleja e Përgjithshme të Këshillit të Evropës, është “ngushtuar” me pyetje nga europarlamentaret Doris Pack dhe Ulrike Lunacek.

Parlamenti Evropian disa herë kishte kërkuar që senatori Marty të flasë para Komitetit për Politikë të Jashtme e këtij organi. Disa anëtarë të këtij Komiteti, si Dorics Pak, Hanes Svoboda dhe eurodeputeti Bernd Posellt i kanë marrë me dyshim akuzat e tij lidhur me trafikim organesh në Kosovë dhe Shqipëri gjatë vitit 1999.

Sipas agjencisë Beta, në takim Marty ka përsëritur se nuk mund të arrihet deri te vërteta e pohimeve të tij për shkak të moshetimit dhe sistemit jo të sigurt të mbrojtjes së dëshmitarëve në Kosovë.

Marty është kundërshtuar nga eurodeputetët, por porosia kyçe e tij ka qenë se nuk ka thënë gjë tjetër nga ajo që e dinë të tjerët, por që ai e ka thënë këtë me “zë”.

Edhe eurodeputeti francez Arno Dangan e ka kritikuar ashpër Martyn, duk pohuar se e ka akuzuar kryeministrin e Kosovës dhe ish-shefin e UCK-së, Hashim Thaçi, edhe pse kurrë nuk ka biseduar me të, dhe se pa arsye thuhet në raport se ka pasur lidhshmëri me tregtinë e organeve në vitin 1999 me transplantimin e organeve me në klinikën “Medicus” në Prishtinë, që është bërë para tri vitesh.

Ndërsa eurodeputetja gjermane Doris Pack ia ka tërhequr vërejtjen Martyt, se është e palejueshme të përmendet emri i që një ish-zyrtar i UNMIK-ut, këshilltar i Ramush Haradinjat, si pjesëmarrës direkt në tregti me organe njerëzore, i cili tashmë gjendet në burgun e Hagës.

Eurodeputetja austriake, Ulrike Lunacek, raportuese për Kosovën, e ka sulmuar ashpër Martyn, duke e kontestuar një pohim në raport, për të cilin u bë e ditur se fare nuk ka ekzistuar.

Por, Marty është përgjigjur se nuk pranon kritikat nga dikush që “nuk e ka lexuar raportin”.


Partia Radikale e Serbisë (SRS), ka vlerësuar se qeveria në Serbi, me politikën e saj pro-perëndimore, ka rrezikuar interesat qenësore shtetërore dhe kombëtare, e ka sjellë vendin në një pozitë tejet të turpshme dhe ka hyrë në proces të njohjes së pavarësisë së Kosovës.

Anëtari i kolegjiumit presidencial nga SRS, Boris Aleksiq, në një konferencë për medie, ka thënë se pranimi i kërkesës së Brukselit dhe Uashingtonit nga ana e Qeverisë që Beogradi dhe Prishtina të hyjnë në bisedime për, siç thotë ai, “të ashtuquajturat çështje praktike”, paraqet vazhdim të procesit drejt njohjes së pavarësisë së Kosovës, transmeton Zëri.

“Këtë proces, qeveria e ka nisur me pranimin e turpshëm dhe kapitullues të rezolutës së Brukselit për Kosovën e cila është miratuar në OKB”, ka thënë Aleksiq, duke shtuar se në atë rezolutë “nuk përmendet statusi i Kosovës dhe Metohisë si pjesë përbërëse e Serbisë”, e cila do të ishte në përputhje me kushtetutën e Serbisë dhe me Rezolutën 1244 të OKB-së.

“Kur Beogradi të përfundojë me zgjidhjen e të ashtuquajturave çështje të jetëve të njerëzve në marrëveshje me secesionistët, më askujt nuk do t’i interesojë nëse Serbia “de jure” e ka njohur Kosovën apo jo, pasi që “në të vërtetë” në praktikë ajo e ka bërë atë dhe kësisoj tregimi për Kosovën ...”, ka thënë Aleksiq.

Kryetari i Partisë Demokratike të Serbisë,Prof.dr. Vojisllav Koshtunica, tha se "qeveria serbe ka poshtëruar vendin në mënyrën më të keqe të mundshme, duke rënë dakord për nisjen e bisedimeve me përfaqësues të shtetit të rremë të Kosovës".

“Është e padenjë që këtë këtë heqje dorë nga Kosova në emër të Serbisë e bën një zyrtar shtetëror, derisa ata që me Kushtetutë janë të thirrur për ta udhëhequr vendin dhe për ta mbrojtur rendin kushtetues, janë të zënë kushtimisht me punë të tjera”, tha Koshtunica, transmeton rfe.

“Çmimi që duhet të fitojë Serbia nga Brukseli dhe Uashingtoni për dialog të suksesshëm me shtetin e rremë të Kosovës, është kandidatura për BE”, tha Koshtunica, për të shtuar se “deri më tash, asnjë vend nuk e ka paguar hyrjen në Bashkimin Evropian me territorin e tij, pos Serbisë”.

Përfaqësuesit e të ashtuquajturës Bashkësi e komunave të Krahinës autonome të Kosovës e Metohisë kanë paralajmëruar se të martën, në një kuvend solemn të kësaj bashkësie, që do të mbahet në Zubin Potok, do të shpallin kryeministrin rus, Vladimir Putin, qytetar nderi të Kosovës.

Kryetari i bashkësisë, Radovan Nicic, ka thënë se Putin do të shpallet qytetar nderi i Kosovës për merita në ruajtjen e integritetit territorial të Serbisë në Këshillin e Sigurimit të OKB.

Duke folur për dialogun ndërmjet Beogradit e Prishtinës, nënkryetari i bashkësisë, Marko Jaksic, ka vlerësuar se “ato bisedime i janë imponuar Serbisë” dhe ka shtuar se ato u duhen shqiptarëve, të cilët nuk mund të lëvizin lirshëm jashtë Kosovës, meqë nuk kanë dokumente të pranuara ndërkombëtarisht.

Jaksic ka vlerësuar se Beogradi zyrtar në ato bisedime do të pranojë çdo gjë, pos njohjes së pavarësisë, në mënyrë që të marrë statusin e kandidatit për BE, duke saktësuar ndër të tjera se do të pranojë targat dhe dokumentet me vula të shtetit të Kosovës.

“Për 130 mijë serbë që jetojnë në Kosovë prioritet janë tema si fati i të pagjeturve, përgjegjësia për trafikimin me organe njerëzore dhe statusi i 250 mijë serbëve e joshqiptarëve të dëbuar nga Kosova”, citon FoNeti kryetarin e Këshillit të Kuvendit të Serbisë për Kosovën, Lubomir Kragovic...