Në një deklaratë me rastin e këtij përvjetori, Sekretarja amerikane e Shtetit Hillary Clinton nxiti udhëheqjen politike të Shqipërisë, si në qeveri ashtu edhe në opozitë, që të udhëheqin nëpërmjet llogaridhënies dhe transparencës, dhe të respektojnë dhe të forcojnë sundimin e ligjit dhe të drejtat e njeriut.
Sekretarja Clinton shprehu mbështetjen e Shteteve të Bashkuara për integrimin e Shqipërisë në Bashkimin Europian. Ajo tha se shqiptarët kanë arritur shumë, por më shumë punë mbetet në rrugën drejt BE-së – dhe ky vit do të jetë me rëndësi kyçe.
Sekretarja Clinton i përcolli popullit të Shqipërisë urimet e Presidentit Barack Obama dhe popullit amerikan. Sekretarja Clinton tha se kjo ditë “përkujton partneritetin tonë, na kujton përparimin e bërë dhe nënvizon premtimin e së ardhmes së Shqipërisë, sidomos ndërkohë që ju ndërmerrni hapat e nevojshëm për të arritur synimin e anëtarësimit në Bashkimin Europian”.
Ajo theksoi lidhjet e forta të miqësisë mes dy vendeve, vlerësoi kontributin e Shqipërisë në forcën e ndërkombëtare të sigurisë në Afganistan, si anëtare NATO-s, si edhe rolin e Shqipërisë për stabilitetin në rajon, e demonstruar nëpërmjet mbështetjes së saj për shtetin e ri të Kosovës dhe kontributeve për pajtim në Ballkanin Perëndimor
