Prof.Dr.sc.Eshref Ymeri : Edhe sa kohë do të presim "rend" dhe "qetësi" nga UNMIK-u dhe EULEX-i në Kosovë?!!!

 

Besoj se i gjithë populli i dashur i Kosovës, me gjestin e fundit armiqësor që ndërmori kundër dy pikave kufitare të Mitrovicës shovinizmi serbomadh, është bindur përfundimisht se UNMIK-u dhe EULEX-i janë dy struktura që kanë ardhur aty jo për t'i zgjidhur përfundimisht problemet shqetësuese të  Kosovës, por për të përkëdhelur, përkrahur dhe nxitur nën rrogoz huliganët e minoritetit serb në veriun e Mitrovicës që të kryejnë akte të tilla vandalizmi. Me moskokëçarjen e tyre para krimeve të kriminelëve serbë në veriun e Mitrovicë, këto dy struktura vërtetuan në praktikë se nuk kanë ndonjë dallim të dukshëm nga trupat hollandeze që sodisnin me shpërfillje vrasjen e 8 mijë njerëzve të pafajshëm në Srebrenicë në verën e vitit 1995. Personalisht jam i bindur se prapa huliganëve dhe gangsterëve serbë të veriut të Mitrovicës, fshihet dora e shovinizmit serbomadh, fshihet presidenti Tadiç, i cili, në daljet televizive kërkon ta heqë veten sikur nuk di t'i turbullojë ujërat, fshihen agjentët e shërbimit sekret rus, të instaluar në strukturat e UNMIK-ut në veriun e Mitrovicës, fshihet shërbimi diplomatik rus në Beograd, fshihet dora e Moskës, e kësaj armikeje të betuar mbinjëshekullore të kombit shqiptar, fshihet dora e kryetarit të Komitetit të Marrëdhënieve me Jashtë të parlamentit rus Kosaçov, e këtij ustai të regjur të hartimit të librit shpifës të Karla del Pontes dhe të raportit të senatorit Dik Marti, të cilëve Beogradi dhe Moska ua kanë ngrohur xhepin mirë e mirë, me qëllim që Ushtria Çlirimtare e Kosovës të stigmatizohet si kriminele dhe të lihen në hije krimet shtazarake të makinës kriminale serbe në Kosovë. Në këto kushte, unë dua të besoj dhe ta falënderoj sinqerisht Kryeministrin Thaçi për veprimet që ndërmori. Në të njëjtën kohë, zoti Thaçi duhet të caktojë një afat përfundimtar për largimin e UNMIK-ut dhe të EULEX-it nga Kosova, në mënyrë që qeveria e tij të vendosë funksionimin e shtetit ligjor në çdo qelizë të territorit të Kosovës. Me këtë rast, dëshiroj t'i shpreh ngushëllimet e thella familjes së heroit të Kosovës Enver Zymberi që ra në krye të detyrës.