CIKËL POETIK NGA POETI SKENDER BERISHA

NGA SKENDER BERISHA


Prof. Skënder Berisha, u lind më 10.10.1959 ,në Prizren. Në qytetin e lindjes mbaroi shkollimin fillor në shkollën ‘’Lidhja e Prizrenit’’ në vitin 1974. Në vitin shkollor 1974/75 nisi mësimet në gjimnazin ‘’Gjon Buzuku’’ në Prizren dhe i mbaroi në vitin 1978/79 .Studimet për letërsi i nisi në vitin 1979 në Universitetin e Prishtinës, ku diplomoi me 1983. Në vitin 1981, mori pjesë aktive në demonstratat e përgjakshme që përvijuan udhën e kërkesës së ligjshme për Republikën e Kosovës.Pas mbarimit të studimeve në vitin 1982/83, nisi punën e mësimdhënësit të Letërsisë dhe të Gjuhës Shqipe në fshatin Piranë dhe Reçan të Malësisë së Prizrenit.Në vitin 1989, më saktë më 28 mars 1989, u arrestua dhe u dërgua në Burgun e Leskovcit dhe të Prokuples. Pas masës së izolimit, u dënua për veprimtari armiqësore me 1,5 vjet burg. Pas lirimit vazhdoi punën e mësimdhënësit të cilën e kryen edhe sot.Pas çlirimit të Kosovës u inkuadrua në jetën politike të Prizrenit dhe të Kosovës së çliruar. Ai shpejt bëhet anëtar i PPDK-së, më vonë PDK dhe zgjidhet kryetar i degës së saj në Prizren. Në vitin 2000, në kuvendin e PDK-së, u zgjodh anëtar i Këshillit Drejtues dhe u propozua për anëtar kryesie.Gjatë periudhës 10 vjeçare, në dy mandate 2000/2008, ka qenë këshilltar në Kuvendin Komunal të Prizrenit. Deri sot, tri herë ka qenë kandidat për deputet në Kuvendin e Kosovës.Prej vitit 1975 merret me krijimtari letrare. Këto krijime i ka publikuar në gazeta dhe revista të Kosovës. Vazhdon të merret me krijimtari letrare.Aktualisht punon si mësimdhënës në gjimnazin ‘’Loyola’’ dhe në shkollën e mesme teknike ‘’Gani Çavderbasha’’në Prizren.Është i martuar dhe ka një fëmijë


LIRIA

Qielli i paskaj me zogj plot
tokë që më nuk rrënkon
zemër që s'ndal rrahjet
bimë që rritesh e s'të zë

ujë që rrjedh e njom brigjet
pyll që nuk pritesh natë e ditë
plak i mirë t'i numron vitet
nënë që ndjell vem rritë

shpirt i qetësuar që nuk digjesh
sy i kthjelltë më nuk vritesh
pjergull e plotë but i mbushur
sofër e shtruar nuk përmbysesh

derë e bekuar ti nuk mbyllesh
myshk e bar nuk mbështillesh
punë e këngë e valle të hidhet
gazit mbarë Pashtriku t'dridhet

20 shtator 2012,Prizren

KUR TË MERR MALLI PËR MUA

Dil e shih detin e kaltër
lag shputat e bardha
bregut vala-vala
mund t'i gjesh
gjurmët që lash

do ta prekësh rërën
që piqet me valët e qanë
a do të qash edhe ti
nuk e di

dil e shih pishat
që ulin kokën
kthyer kah deti

do të kthehesh në shtëpi
dhe do t'i prekësh sendet një nga një
mobiljet do të duken
trungje të hedhura në shkretëtirë
ku do të ndeshësh me pahir

skutat e zbrazura
zymtësi në lulet që s'i ujit më
si përpara

do të presësh telefonin memec
mos në çast do të cingërrojë
a do të hesht si ti...

dil e shih dil e shih
si gëzohen valët
si këndon porti
se po vi te ti

20 shtator 2012,Prizren

VJESHTA PO VONON

Po vonon prap
jo ti vjeshta erëmira
ftonjtë në pritje
mollat skuqur si ti

e më shkon lëng gojës
kur e di se një ditë
do të jesh aty

edhe mollët

ani pse vonon
si shiu sivjet
unë e ti
vapë do ta kemi krejt

s'do numërojmë më vitet
muajt edhe ditët
unë këtu ti këtu
s'na ndan gjë

po vonon
po do të vijë vjeshta
sikur që do të vish ti

23 shtator 2012,prizren

SHI

Erdhe më në fund
në krahët e këtij mëngjesi
shtator prap po endet
shpirtit tim e të Pashtrikut

sa i prajshëm plot edukatë
shkollë më e lashta
e vendit tim
e Kikës Pshtrikut
tash po bjen

e njomë buzëshkrumin
e lisave të mi
që djegur më flasin
me atë gjuhë bjeshke

ujë tokës more
m'i jep m'i jep edhe
e shtohen djepat
pëkundet liria
o në ta në ta

20 shtator 2012,Prizren


U THAVA

Mbrëmjes së qetë që s'ndërron lëkurë
rri e të pres e s'të shoh larg as afër
lëvrin diçka e jotja përreth si erë e njohur
e pres t'ma kaplojë trupin pa u ftohur

si me rend edhe blinjtë e udhës sime
sikur përgatiten për takimin e pritur
rrokullisen kanaqet dhe qeset fluturojnë
rrihet blerimi i vonuar nga pluhuri i trajnuar

te flokët e mia bien tufëza drite të trembura
farfurinë lumë i lodhur ndër valle ndotjeje
aromë e rëndë vjen te hundët e shembura

kolovajzë letrash të dyndura pullazeve
flenë porositë e lëna me të kuq buzësh
puthjet e zjarrta të kuqe të lëna udhëve

19 shtator 2012,Prizren

DERA

Tash kuis trishtueshëm
natën edhe ditën ma therr
ma mbush vaj me qerre
s'e di a qanë për ty
a tallet keq me mua

mbyll veshët era kur e pahit
me dorë nuk e qas
as ta mbyll as ta hap

e rrjedhin ditët edhe netët
mbushur kuisje të ndryshkur
sjell vjeshta gjethin e vyshkur

s'je ta fshish pak këtë monotoni
me të cilën egër po grindem
s'e di agimit si do t'i avitem

gjumit ia harrova portretin
nga zemërimi shita krevatin
kurrë ëndërr s'e shoh vetin

19 shtator 2012,Prizren

PAS PAK

Mbrëmjes i jep ujë në bisht të lugës
e kthen kah unë se i bën leqe udhës
gjethet sa po dridhen në hallin e vet
edhe sonte ti zemrës moj foli drejt

e hidhe hapin urës me sa më shpejt
të pret natë e sertë veshur dritëhije
sa shkëlqen sonte gdhendur bukurie
ta pijmë këtë kupë vere me ka krejt

si kokrra e rrushit je me të vërtetë
e bardhë e ëmbël moj e pak e sertë
pres ta di a do t'më shtrohesh lehtë

do të rri edhe shumë do të të pres
po eja më shpejt ta ndiej hapin
ç'e hidhke bukur moj pa asnjë ves

18 shtator 2012,Prizren


ERDHI

Mbi xhamat e dritares
përshkllihet drita
dhe rrëshqet mbi fytyrën
e bukur më se rrezja

e zgjohen lulet e ballkonit
sogjojnë mbi ty
kur do ta hapësh atë sy

heret të zgjohet gjithçka
veç pëllumbave që fjuruan për ujë
dhe veturave që i nguc kolli
e u trazohen mushkëritë e djegura

u tremb diçka brenda teje
dhe doli si drithmë e zvargur
një titërrimë deri te qepallat
e brofi përpjetë gjiri i ardhur

17 shtator 2012,Prizren


PAK NATË...

Sonte më ngushllon
vetëm pak natë
e mbushur me ty
një copë re
që endet
aty pranë

një çast i yt gazi
dhe gjtithçka ndërron
qesh limoni

një kuqëlim perëndimi
që bie mbi Pashtrik
pa asnjë trik
bie pelimi

e të them
e më thua
te e vona
të dua
të dua

25shtator 2012,Prizren


KUR MU DESHTE

Sa padiktueshëm erdhe
e sfidove vapën
kulloshtër e shpirtit
moti të munduar
bredhacak i moçëm
i udhëve që s'i shkeli kush

veç ti hyre në mua
deri te ky shpirt
që nuk dyndet kund
ani se nuk zë vend

tash fol e ecë e luaj vendi
mos më mbaj mëni
nuk jemi më fëmijë
kur putheshim tinëz e s'e theshim

edhe vet kur të mbes
edhe vet kur të mbesim
menjëherë nuk vdesim

kemi për të vuajtur
për njëri -tjetrin

24 shtator 2012,Prizren

SHUHET A S'SHUHET

Zjarri me zjarr shuhet
jo me ujë
as me fjalë moj
ah sa mirë e di ti
e s'e thua
ti mirë e di
si shuhet

si bëhet trupi akull
e mërdhijnë buzët
e nxijnë
pas pickimit të gjatë

ani ani mos e thuaj
se hyn therrë e huaj
e na marrin vesh

e mbushet lagjia
me blegërima
që s'prajnë as në muzg
as krye jave

zjarri me zjarr shuhet
edhe ndizet prap

24 shtator 2012,Prizren

PËR NATËN E MIRË

Prizren natën ma bëj të mirë
ende rri nën shelnjen e re
nën atë flokëkaçurelen
e po të lag pakëz me raki

po dua të të them
bëfsh gjumë të ëmbël
edhe me një gotë

por të të lë
zemra nuk m'bën dot

tashmë ikën të gjithë
ngadalë ikin edhe dritat
shkoi edhe shoku Mitat

po dua të të lë pa e marrur vesh
sikur dal për ujë atje në shesh
them do t'ma zësh tradhëri
e shpejt hedh një gllënkë raki

bëj të ngritem
po këmbët s'më bëjnë
as zemra s'e do
të të them natën e mirë

22 shtator 2012,Prizren

E Ç'BËN TASH

E tash rri e luaje derën
s'të mbeti të besh gjë tjetër
s'më dëgjove të thash mos e humb verën
në daç nisja prap me avazin e vjetër

klith bërtit deri në kupë të qiellit
më dhimbsesh po s'kam ç'të të bëj
të thirra qyqe vetëm kur ishe

e të nxorra ku vlonte jetë në kokërrdiellit

ti mbaje huj me mua dhe theje gishtërinjtë
kokëulur e vërenjtur si re e rënduar
sikur mbaje dert për qypin me flotinjtë
s'të mbaj inat prap edhe pse të kam ftuar

sa herë trokon rëndë me vapë vera
unë prap moj e vrenjtur të bie kah dera
dil e pritmë moj sikur në kohëra tjera
harrojmë zgripcet e zbulojmë lojëra të reja

22 shtator 2012,Prizren

ZGJOHU

Dielli ka rënë tashmë
mbi petkat tua tutël
mbi ninëzat e ndera
zgjohu se shkoi vera

ëmbël të prekin rrezet
mbi flokët e shprishur
edhe gjurmët e veprës

trupit tënd të stisur

gjethi i rrëxuar molle
po bredh nëpër ty
ngritu moj e hollë
çilma atë sy

lodhur n'prita të mia
dritare e hapur
shumë m'je përgjumur
mbasi më je tundur

21 shtator 2012,Prizren

SA E BUKUR MË VJEN

Bregut të shpirtit ç'po më troket
si uji i ftohtë i gurrës së moçme
zemrës së gurit i akulluar
sa pa ardhur agimi i kuqëluar

sa ëndshëm m'i lag damarët e lodhur
e pak më lart sytë e pafjetur
sa idhnak të jam e ti nuk prishesh me mua

diçka e re prej fundesh sakaq u gjallërua

ti rri e më duron me të përqafuar
vjen e rritet sa me të gufuar
mallë i imi i vjetër që ngjallet papërtuar

edhe pak e më shumë do të nis të të dua
se të kam të vetmen moj shpirtkë
të kam kaq afër nuk të gjej në asnjë krua

21 shtator 2012,Prizren

DALIM
Nga kati i pestë edhe
ngjitemi në të pesëmbëdhjetin
te pishat e Cylenit
dhe mbushemi frymë zemër
krejt si atëherë

botë pa dritare pa kontejnerë
sa afër qiellit e tokës

nadja e mirë zogj të lumtur
këtu do t'u falemi deri në muzg

pijmë e na pihen dhëmbët
në kroin e parë edhe të dytë
ku shpërlajmë sytë e turbullt
ende të përgjumur

e nisim e rritemi me barin
me pishat e mbjellura në aksion
kujtojmë kallot e duarve të njoma
dhe duhemi shumë e shumë

të dua krejt afër kreshtave
aty ku mbiu mundi ynë
ku hapnim boça gështenjash
ku deheshim me një frymë

17 shtator 2012,Prizren