Çmim poetik për Flora Brovinën

Në Kumanovë të Maqedonisë, te premten u mbajt aktiviteti “Takimet Poetike të Karadakut”, qe është një aktivitet i përvitshëm, që mbahet në përvjetorin e demostratave së studentëve dhe popullit të Prishtinës të vitit 1981, ku u shpreh publikisht vullneti i popullit të Kosovës për Republikë dhe Pavarësi.

Kryetari i klubit letrar “Jehona e Karadakut”, shkrimtari Burhanedin Xhemaili u shpreh, se ky takim përkon me 30 vjetorin e këtyre demostratave, një datë domethënëse kjo për të gjithë shqiptarët kudo që janë, e cila shërben për t’i motivuar më tej ata për integrim të të gjithë hapësirave kulturore shqiptare, bashkëpunim dhe fuqizim të faktorit shqiptar.

Ketu moren pjesë poetë dhe krijues nga Maqedonia, Shqipëria, Kosova, Lugina e Preshevës në Serbi dhe Bosnjë-Hercegovina, shkruan ''Standard''. Nga Shqipëria ishin të pranishëm poetët Bajazit Cahani, Kujtim Morina, Agim Bajrami, Pëllumb Gorica dhe Man Poga.

Në fund të aktivitetit u ndanë cmime për poezitë më të mira të lexuara.
Me çmim të parë u nderua poetja dhe veprimtarja e shquar e të drejtave të njeriut, Flora Brovina, çmimi i dytë iu dha poetit Kujtim Morina nga Shqipëria ndërsa çmimin e tretë e mori poetja Lumnije Thaci.