KOSOVA VULLKAN I PASHUAR

(Poezia e ruajtur në mëndje nga e motra, Shemsije Elshani) Kur vullkani popull u zgjua, Dhe plasi në zjarr e shkëndija, Zhgani titist u tmerrua, Ndërhyri pa ftuar Serbia. Me 11 mars plasi e para, Kushte kërkonte rinia, Po me sudentët „plehra" S'donte të merrej mafia. Dhe me 26 sërish, Shpërtheu protesta rinore, Atëherë mbi ne u turrën, Si kafshë hordhitë policore. Prapë me 1 dhe 2 prill Shpërtheu ajo në çdo anë, Dhe toka e qielli u nxinë Nga tanke dhe aeroplanë. Ne që kemi provuar Pogromet e karagjorgjeviqëve, E dimë shumë mirë ç’do të thotë Milici popullore titiste. “Ju jeni kafshë, shiftarë, ju duhet zhdukur, shiftarë, a s'ju dhamë mjaft, shiftarë, ç'kërkoni më shumë, shiftarë?“ U turrën ata mbi ne Me britma, sharje, kërcënime Tradhtarët në shtyp e TV U mbanin ison me fjalime. Na quajtën vandalë, pa fre, Ne që s'kishim veç grushte, Ne që ngrinim gjer në re Parullën Republikë dhe Kushte. Dolën me ne dhe fëmijët Demonstrim brezash qe Bombat e gjalla ua kthenim Dhe linim gishtërinjtë për dhé. I linim dhe jetërat tona, asgjë s'na dhimbsej për bé, po me fëmijët tanë ç'keni, përse i fyeni ata, përse? Gavroshët tanë guximtarë U hodhën kundër jush pa frikë, Askush nuk i detyroi, Veç shpirtit patriotik. Shiko atë vajzë me flamur Këngë partizane këndon “Eja mblidhuni këtu, Këtu ku lufta na fton”. Dhe pleqtë me lot në sy, dhe femrat, kreshpëruar, e fortë je Kosova ime ti, E afërt ditë e ëndërruar. E qetë tani është Prishtina Ne ecim netësh n’trotuare Na shihni në sy ju stërvina Në ta do të shihni zjarre. Na shihni ju drejt në sy, Në ta do të shihni zjarre, Vdekjen do të gjeni aty, Ditën e përmbytjes së madhe. Therandë, Maj 1981