Mbyllen ditët e kulturës Shqipëri-Kosovë

Janë mbyllur dje në Prishtinë ditët e kulturës Shqipëri- Kosovë. Ka qenë shfaqja e dramës “Darka e gabuar” e Ismail Kadaresë, një realizim i Teatrit tonë Kombëtar, pjesa që ka shënuar dhe përfundimin e aktiviteteve të kësaj ngjarjeje.

Ditët e kulturës Shqipëri- Kosovë u realizua nën motivimin e ndërmarrë nga nisma e Kryeministrit të Shqipërisë “Një komb, një kulturë”, të zhvilluar në kuadër të trevjetorit të Pavarësisë së Kosovës dhe gjithashtu në zbatim të memorandumit të bashkëpunimit nënshkruar tre vjet më parë nga tre teatrot kombëtarë shqipfolës të Tiranës, Shkupit dhe Prishtinës.

Ditët e Kosovës nisën në Tiranë në datat 5-6 shkurt kur trupa e Teatrit Kombëtar Prishtinë u prezantua për publikun e kryeqytetit me shfaqjet “Vdekja dhe vasha” dhe “Heshtja”. Ndërsa në datën 13 shkurt sërish Teatri Kombëtar i Prishtinës dha shfaqjen “Çifti Martin” nga Eugen Yonesko me regji të Bekim Lumit dhe interpretimin e Gresa Pallaskës dhe Astrit Kabashit.

“Vdekja dhe Vasha” është dramë psikologjike e autorit kilian Ariel Dorfman, e cila është punuar në shumë teatro nëpër botë, madje është bërë edhe film nga regjisori i njohur Roman Polanski në vitin 1994, në të cilin luajnë aktorët e njohur, Sigourney Weaver, sir Ben Kingsley dhe Stuart Wilson. Në versionin tonë të “Vdekja dhe Vasha” regjia është realizuar nga Fatos Berisha, ndërsa interpretojnë aktorët e mirënjohur kosovarë: Yllka Gashi, Shkumbin Istrefi e Luan Jaha. Shfaqja është kamertale dhe publiku është i vendosur në skenë. Tema e kësaj shfaqjeje në qendër ka një grua me një të kaluar shumë të dhimbshme, e cila jeton mes të kaluarës dhe të tashmës.

“Heshtja” me autor Refet Abazin, regji nga Arta Kallaba dhe skenografi nga Bujar Muça solli në skenë aktorët: Xhevdet Jashari, Yllka Gashi, Çun Lajçi, Igballe Qena, Bislim Muçaj, Leonora Mehmet, Enver Petrovci, Donat Qosja.

Varfëria, lidhja dogmatike për vlerat ideologjike të shkelura nga koha, si dhe sjellja diktatoriale e babait janë shkaqet e raporteve jo të shëndosha në familjen e enveristit Dema, në të cilën heshtazi kalohet mbi dhunën incestoide që ai e ka kryer mbi të bijën Nita, e cila prostituohet për të mbajtur familjen.

Nën peshën e obligimeve ekzistenciale dhe problemeve profesionale, Ariani (i biri i Demës) nuk arrin ta ruajë lidhjen dashurore me Zanën. Nuk arrin ta shpëtojë as motrën Nitën, që do të bëjë vetëvrasje me një dozë të tepruar.