Majlinda Bregu, replikon me “New York Times”

Një debat mediatik ka nisur në gazetat ndërkombëtare mes zyrtarit të Bashkimit Evropian, Daniel Korski dhe ministres shqiptare të Integrimit, Majlinda Bregu. Korski, në një editorial botuar në “New York Times” ka sugjeruar që në Shqipëri, Bashkimi Evropian për shkak të krizës, duhet të shohë mundësinë për zgjedhje të reja vitin e ardhshëm, në mënyrë që shqiptarët të mos humbin regjimin e liberalizimit të vizave por edhe të vihet në diskutim anëtarësimi i vendit në NATO.
Duke vënë në dukje korrupsionin e madh dhe situatën pas 21 janarit 2011 ku pas protestës së opozitës u vranë 4 persona dhe u plagosën disa të tjerë, zoti Korski, i cili punon në Këshillin Evropian të BE-së për marrëdhëniet me jashtë që nga tetori 2007, (dhe sipas CV së tij më parë ka qenë këshilltar në departamentin të shtetit të SHBA-së), sugjeron ndërhyrje të shpejtë në Shqipëri. Komenti i tij (të cilin do e botojmë të plotë) është botuar në “New York Times” në datën 29 janar 2011.
Por gjithë kjo histori i ka “djegur” zyrtarëve të qeverisë shqiptare. Majlinda Bregu, ministre e Integrimit, ka dërguar një letër në “International Herald Tribune”, duke konsideruar në reagimin e saj se shkrimi i Korskit ka shumë pasaktësi. Shkrimi i ministres së Integrimit është botuar edhe në rubrikën e letrave dhe reagimeve në “New York Times” nën titullin “Albania’s progres”. Ministrja Bregu, në mënyrë më të shkurtër, hedh poshtë çdo pretendim të Korskit, për zgjedhje të reja dhe një qeveri tjetër, duke deklaruar se qeveria aktuale është zgjedhur në mënyrë demokratike, dhe zgjedhjet e 2009 përmbushën standardet e OSBE-së.