Sot në Gjykatën e Krimeve të Rënda, prokuroria ka dhënë pretencën për të pandehurin Aldo Bare, mbi të cilin rëndojnë disa akuza për vepra penale, mes të cilave dhe vrasjet për disa persona. Duke renditur faktet, Prokurorët kanë kërkuar sot burg përjetë për Aldo Baren. Prokuroria tha se nga shqyrtimi gjyqësor, u provuan akuzat e ngritura ndaj kapos së bandës së Lushnjës, i cili u arrestua në Turqi në vitin 2005 dhe më pas u ekstradua në Tiranë në nëntor 2009. Sipas prokurorisë, Aldo Bare duhet të shpallet fajtor për akuzat: "Vrasje me paramendim" të shtetasit Genci Kashari "Vrasje me paramendim" të shtetasit Masar Aliu "Vrasje me paramendim" të shtetasit Xhevat Demiri "Vrasje me paramendim" të shtetasit Nimet Zenelit "Vrasje me paramendim" të mbetur në tentativë të shtetasit Artur Daja "Vrasje me paramendim", të mbetur në tentative ndaj shtetasve Gramoz Selmani dhe Masar Aliu "Mbajtje pa leje të armëve luftarake" "Shkatërrim të pronës me zjarr" të banesës së shtetasit Shkëlqim Haxhiu "Krijim të Organizatës kriminale" "Kryerje të veprave penale nga organizata kriminale" . Aldo Bare i ka mohuar akuzat ndërkohë që pritet që seancën e ardhshme të paraqiten konkluzionet me kundërtshtimet e avokatit mbrojtës. Prej muajsh, vazhdon procesi gjyqësor ndaj Aldo Bares. I cilësuar si kapoja e bandës së Lushnjes akuzohet për 20 vepra penale si, krijim organizate kriminale, vrasje, plagosje, etj. Ai u ekstradua drejt Shqipërisë në nëntor të vitit 2009, pas tri vitesh qëndrimi në qelitë e burgjeve turke. Aldo Bare alias, Alfred Shkurti për vite të tëra ka qenë një ndër emrat e renditur në listën e personave të shumëkërkuar të drejtësi. Krimi më i rëndë që rëndon mbi supet e tij është ekzekutimi i Artur Dajës, armikut të tij të përbetuar, të cilin e cilësonte përgjegjës për vrasjen e të vëllait. Viktimës i preu kokën dhe ia shëtiti përmes qytetit të Lushnjës.
