Është turp për kulturën politike në Gjermani, që Karl-Theodor zu Guttenbergu është ende në post. Një ministër, i cili është vërtetuar se ka gënjyer, i cili mori me anë të plagjiaturës një titull akademik, nuk mund të qëndrojë në post.
Kjo nuk është e denjë për një shtet ligjor demokratik. Është turp, që Bundestagu Gjerman u detyrua të merrej një ditë të tërë me plagjiaturat e ministrit, i cili me arrogancë dhe i mbështetur prej gazetës Bild i bën bisht çdo përgjegjësie. Dhe është turp, që ky ministër mbështetet prej kancelares dhe prej deputetëve të fraksioneve qeveritare.
Karl-Theodor zu Guttenberg, kjo dihet tashmë, ka gënjyer. Ai ka pretenduar se e ka përgatitur disertacionin me ndërgjegje të plotë dhe pas një pune të imtë shtatëvjeçare. Të gjitha akuzat se kishte kopjuar ai i hodhi poshtë si të pakuptueshme.
Vetëm atëherë, kur dëshmitë për plagjiaturat nuk mund të mohoheshin më, kur u bënë publike gjithmonë e më shumë hollësi mbi gënjimet e ministrit gjatë punës së tij dhe në jetëshkrimin e tij, ai vendosi tërheqjen e kontrolluar. Do të heqë dorë nga titulli doktor, tha ai.
Të kuptuar i çuditshëm i së drejtës
Për një njeri që ka studjuar drejtësi. Titulli akademik nuk mund thjesht të kthehet mbrapsht. Aq më pak mund të pengohet në këtë mënyrë hetimi i kujdesshëm i akuzave. Sepse me sa duket, ky ishte synimi i Guttenbergut. Me këtë lëvizje çliruese, me këtë siç tha ai "heqje dorë të dhimbshme", ai donte t'u hiqte bazën sulmeve dhe njëkohësisht të paraqitej si mëkatar i pastruar.
Por kjo s'u arrit. Universiteti i verifikoi pjesët e vjedhura dhe çnjohu titullin akademik. Profesorët nuk deshën të shpreheshin në lidhje me akuzat për mashtrim të qëllimshëm, por rezultati i verifikimit të tyre është edhe kështu i mjaftueshëm: ministri është zbuluar si plagjiat, si gënjeshtar dhe veç kësaj si mashtrues.
Ai nuk mund të qëndrojë më në post, s'ka rëndësi se sa sharmant është dhe sa e madhe është dhuntia i tij politike.
Këtu nuk bëhet fjalë për vogëlsira, për punë të falshme shkel e shko, për thonjëza dhe shënime në fund të faqes të harruara. Bëhet fjalë për mashtrim të ndërgjegjshëm dhe gënjim, për mungesë respektimi ligji dhe besueshmërie.
Kredibiliteti i shkencës
Dhe bëhet fjalë për namin e shkencës gjermane, për namin e të gjithë atyre, që vërtet me punë të mundimshme dhe shumëvjeçare shkruajnë disertacionet e tyre, pa familje me pasuri në miliona në sfond, që për këtë detyrohen të pranojnë humbje financiare, që madje ndoshta u duhet të shtyjnë ngritjen e familjeve.
Bëhet fjalë për dinjitetin e gjithë atyre shkencëtarëve të rinj, që duhet ta kalojnë jetën në kushte gati çnjerëzore në universitetet gjermane, të thara prej reformave neoliberale dhe që pranojnë shumë mungesa dhe pasiguri ekonomike për të ndjekur karrierën e tyre shkencore.
Është për të ardhur keq, që erdhi deri këtu dhe që një politikan i ri pa dyshim i talentuar e dëmtoi kështu emrin e vet, por në rast se Karl-Theodor zu Guttenberg qëndron në post, atëherë kultura politike në Gjermani është dëmtuar për kohë të gjatë.
Përgatiti Flori Bruqi.
