Koalicioni i mundshëm qeverisës në mes të Partisë Demokratike të Kosovës dhe Aleancës për Ardhmërinë e Kosovës, dhe takimet “sekrete” të herëpashershme të liderëve të këtyre dy partive, janë të orkestruara nga Qeveria e Kosovës madje me qëllimin e vetëm – tërheqjen e vëmendjes nga problemet e mëdha.
Të paktën kështu e përshkruajnë analistët politik sjelljen e partive të dala nga lufta prej momentit që në Kosovë ka arritur lideri i Aleancës, Ramush Haradinaj, i shpallur i pafajshëm nga Tribunali i Hagës.
Analisti Nexhmedin Spahiu, thotë se fakti që shumë medie kontrollohen nga pushteti të bënë të besosh se temat që ngrihen në opinion janë të orkestruara nga “të fuqishmit” e ekzekutivit.
“Për shembull, përgjimi i telefonatave është një gjë e cila është skandal i dorës së parë, mirëpo ajo shumë pak është bërë temë,sepse,vetëm disa media janë marrë me të dhe disa të tjera tërthorazi dhe kjo punë është harruar. Ka skandale të tjera, siç janë ato të korrupsionit, ose ikja e të dënuarve nga paraqitja në burg. Të gjitha këto skandale në çdo vend të botës nuk do të zbrisnin nga top-lista, dhe do ta linin nën hije çfarëdo korrelacioni të mundshëm, e kjo nuk po ndodh”.
Por, zëdhënësi i AAK-së, Ernest Luma, thotë se Aleanca nuk është duke u përdorur nga qeveria për t’i mbajtur në “plan të dytë” temat e rëndësishme, ndërsa thekson se është i nevojshëm partneriteti me partinë e kryeministrit Thaçi, PDK-në.
“Konspiracionet e tilla dhe paragjykimet e tilla mbase nuk janë të shëndetshme për skenën politike në Kosovë dhe për proceset nëpër të cilat po kalojmë. AAK-ja është parti e përgjegjshme dhe e di çfarë kërkon, e çfarë mandati ka de e se kush duhet të dalë në udhëheqje të këtyre proceseve, pra si parti politike ne nuk humbim kohë me paragjykime të tilla”, ka thënë Luma.
