Zbulohen emrat e 62 shqiptarëve të varrosur në veri

Një dokument për vrasjet dhe vendvarrimet e personave të vrarë i policisë serbe, i cili është zbuluar nga shoqata për të pagjetur “Zëri i Prindërve”, ka alarmuar familjet me të pagjetur të komunës së Mitrovicës. Sipas këtij dokumenti, të cilin e ka bërë publik kryetari i kësaj shoqate, Bajram Çerkini, 42 shqiptarë të vrarë në pjesë të ndryshme të Mitrovicës janë varrosur në varrezat myslimane, ndërsa 20 të tjerë janë varrosur në një varr masiv në Kolludër të Zubin Potokut.

“Kemi të dhëna të konfirmuara nga një dokument i ushtrisë dhe i policisë serbe, se në varrezat e myslimanëve që ndodhet në dalje të Mitrovicës, për në Zveçan, nga 4 maji i vitit 1999 e deri me 20 qershor po të njëjtit vit janë varrosur trupat e 42 personave. Sipas dokumentit, ata janë varrosur veç e veç, jo në varr masiv. Gjithashtu sipas këtij dokumenti, në Kolludër të Zubin Potokut janë varrosur edhe 20 shqiptarë të ekzekutuar në lokacione të ndryshme në Mitrovicë”, ka precizuar Çerkini.

Ai ka shprehur shqetësimin e familjarëve me të pagjetur, të cilët alarmojnë të gjitha institucionet që të bëjnë diçka që të dhënat nga ky dokument të zbardhen. “Kjo tregon se nuk ka më shpresa se ndonjëri nga të rrëmbyerit nga policia dhe ushtria serbe të jetë gjallë. Si shoqatë, ne anashkalohemi dhe injorohemi plotësisht. Ky dokument i gjetur do të thotë vrasje e dytë për familjet me të pagjetur. Ka 14 vjet që përballemi me përpjekjet për zbardhjen e fatit të tyre, ndërsa tani nuk na lejohet t’i marrim eshtrat e më të dashurve tanë. Tani, pasi që dihet se trupat e 42 shqiptarëve të ekzekutuar ndodhen në varrezat e myslimanëve në dalje të Mitrovicës, për në Zveçan dhe të 20 të tjerëve në fshatin Kolludër të Zubin Potokut, pse atëherë ndërkombëtarët nuk na lejojnë që të shkojmë e t’i zhavarrosim ata dhe t’i sjellim në token e tyre. Kjo është një lojë që po luhet me ne”, ka shfryrë me mllef z. Çerkini.

Ai ka shtuar, se bazuar në dokumentin e gjetur të policisë dhe ushtrisë serbe, e di saktësisht se ku ndodhet vendi i shqiptarëve të vrarë, të cilët janë varrosur në veri të Mitrovicës dhe në Kolludër të Zubin Potokut.

Ai u ka bërë thirrje institucioneve të shtetit që të koordinohet me ato ndërkombëtare dhe të nisin menjëherë procesin e eshkumimit të mbetjeve mortore të 62 shqiptarëve të vrarë në anë të ndryshme të Mitrovicës, e të cilët janë varrosur nga autorët e krimeve në veri të Mitrovicës dhe në Kolludër të Zubin Potokut.