Adem Grabovci: Të rishikohet mandati i EULEX-it

Partia Demokratike e Kosovës e kryeministrit Hashim Thaçi pas paraburgosjes së nënkryetarit të saj Fatmir Limaj, kërkon që të rishikohet mandai i misionit të EULEX-it. Shefi i Grupit Parlamentar të PDK-së Adem Grabovci, ka thënë se kjo parti do të kërkoj nga Kuvendi i Kosovës rishikimin e mandatit të EULEX-it pas paraburgosjes së Fatmir Limajt dhe tre të tjerëve për rastin “Kleçka” i cili është kthyer në rigjykim nga Gjykata Supreme. Grabovci këto komente i bëri në një konferencë për media. Ai tha se GP i PDK-së është thellësisht i brengosur dhe i zhgënjyer me veprimin e fundit të EULEX-it që ndërlidhet me rastin “Kleçka”. “Me veprimet e tilla, EULEX-i po rrezikon proceset në tërësi dhe veprimet e tilla nga ana jonë konsiderohen të padrejta dhe të papranueshme. Prandaj konsiderojmë se Kuvendi i Kosovës duhet ta rishikoj mandatin e EULEX-it në Kosovë”, ka deklaruar Grabovci. Sipas tij, mënyra se si misioni evropian po merret me rastin “Kleçka” është e turpshme dhe denigruese që mund të bëjë ndaj të akuzuarve, por mbi të gjitha, ndaj institucioneve të Kosovës. “PDK-ja beson në drejtësi dhe pavarësi të gjyqësorit, mirëpo drejtësia nuk duhet të keqpërdorët në këtë formë më qëllim të diskreditimit të luftës sonë për liri”, ka thënë Grabovci.