U vlerësua durimi i zotit Haradinaj dhe i bashkëluftëtarëve të tij

1.


Përkrahës të Liderit të AAK’së, Ramush Haradinajt, kanë dalë për ta pritur atë në Aeroportin Ndërkombëtar të Prishtinës.

Reporteri i ExpressOnline thotë se ata po vallëzojnë nën tingujt e tupanave dhe surleve.

Haradinaj u lirua sot në mëngjes nga Tribunali i Hagës, si i pafajshëm për akuzat për krime lufte.

Rreth orës 17: 15 – 18:00 pritet që aeroplani që bart liderin e AAK’së dhe dy bashkëluftëtarët e tij të aterojë në Aeroportin e Prishtinës.

2.


Këshilli Organizues për pritjen e Kryetarit të AAK-së dhe ish-kryeministrit të Kosovës, Ramush Haradinaj, njofton të gjithë përfaqësuesit e medies dhe opinionin publik se Ramush Haradinaj pritet të arrijë në aeroport në ora 17:00, me një fluturim të veçantë nga Holanda.

Ramush Haradinaj tha përmes avokatit të tij Ben Emmerson se është "koha për pajtim" dhe se do të “garantojë të drejtat dhe pjesëmarrjen e plotë të serbëve në jetën politike të Kosovës".

Pas vendimit, Emmerson u tha gazetarëve se "Haradinaj do të udhëheqë qeverinë që do të përfaqësojë të gjithë qytetarët, çfarëdo gjuhe që flasin, pa marrë parasysh se prej nga vijnë dhe pavarësisht nga kombësia e tyre”.

"Është koha për pajtim", tha Haradinaj përmes avokatit të tij.
Siç njoftoi avokati, Haradinaj do të ballafaqohet ashpër, kudo, me korrupsionin në Kosovë.


3.


Lideri i AAK-së Ramush Haradinaj ka arritur në Aeroportin e Prishtinës. Të pranishëm janë kryeministri Hashim Thaçi, nënkryetari i AAK-së Blerim Shala, ministri Agim Çeku si dhe zëvendës kryeministrat Behgjet Pacolli dhe Hajredin Kuçi.

Këtë rradhë e kryeson bashkëshortja e tij Anita Haradinaj me të cilën ai u përshendet më së pari.


4.

Ish-kryeministri Ramush Haradinaj tashmë ka mbërritur në shtëpinë e tij në lagjen "Arbëria" në Prishtinë ku është pritur nga familjarët dhe qytetarë të shumtë.
....

Mirë se erdhe në Kosovën e pavarur ish-kryeministër, kështu iu drejtua kryeministri i Kosovës, Hashim Thaçi, ish-kryeministrit Ramush Haradinaj.

“Sot për qytetarët e Kosovës, para së gjithash për z.Haradinaj si dhe për familjen e tij është nja lajm i gëzueshëm si dhe për luftën e drejtë.
U vlerësua durimi i zotit Haradinaj dhe i bashkëluftëtarëve të tij. Ky është plotësim i festës së 100 vjetorit. Në emrin tim personal, të qytetarëve të Kosovës, të gjithë miqve ndërkombëtarë iu dëshiroj punë të mbarë në jetën politike aktive. Jam i bindur se çdo familje ndan të njëjtin gëzim” ka thënë kryeministri Thaçi.

Ndërkohë, ish-kryeministri i Kosovës, Ramush Haradinaj ka falënderuar të gjithë për mikpritjen.

“Falënderoj për mirëpritjen për mua dhe bashkëluftëtarët e mi. Drejtësia ka konfirmuar edhe një herë se rruga ka qenë e gjatë por e drejtë. Jam gëzuar për arritjet e jam mërzitur për sfidat dhe problemet që i ka pasur Kosova” ka thënë Haradinaj

4.

E di se ka kohë që nuk ju kam folur, e kemi çka me i thonë njëri-tjetrit. Por, fjalët dua t’i kursej, e punët jo. Do të jem në punë tash e tutje. Zoti e bekoftë Kosovën, ka thënë Ramush Haradinaj, duke iu adresuar qytetarëve që festojnë lirinë e tij, në Sheshin “Nëna Tereze” në Prishtinë.
Avokati mbrojtës i Haradinajt, Ben Emmerson, nuk mundi ta marrë fjalën nga fishekzjarrët e ndezur në Shesh. Haradinaj u drejtohet sërish qytetarëve.

“Faleminderit shumë. E kam me mua një mik. Kur kam filluar procesin gjyqësor. Nuk i kuptoja procedurat. Më tha që në rrethana tjera kisha ecur pas teje, e tash ec ti pas meje. Unë kam ecur këto tetë vjet pas tij. Ai është Ben Emmerson”.

Emmerson tha se sot bëhen shtatë vjet qëkur ka ardhur për herë të parë në Kosovë.

“Gjatë kësaj beteje të vështirë e kam ndier veten si mik të Kosovës. Dhe nëse më lejoni e dëshironi, me dëshirë do të bëhesha qytetar nderi i Kosovës”, ka thënë ai.

“Sot në mëngjes bëra deklaratë në emër të Ramush Haradinajt. Në atë deklaratë i bëra thirrje Carla del Pontes që t’i kërkoj falje edhe Ramushit, edhe Kosovës. Por, ajo nuk kërkoi falje sot. Për mediat serbe në këtë thirrje ajo qeshi. Zonja del Ponte kjo nuk është qesharake. Nuk është shaka. Dhe, nëse kjo është përgjigja juaj e vetme kjo tregon se sa seriozisht e merrni përgjegjësinë tuaj në një gjykatë ndërkombëtare për krime të luftës”.

Meqë del Ponte nuk kërkoi falje, Emmerson thotë se tani kalojmë në fazën e dytë.

“Sot pasdite Sir Geoffrey Nice, prokuror në rastin e Milosevicit, e akuzoi për shkelje të rënda dhe gjykime të gabuara politike. Ai e ka akuzuar se ka injoruar këshillat e avokatëve të saj dhe se e ka kënaqur politikisht Beogradit. Dhe ai ka bërë thirrje që të zhvillohen hetime të pavarura për vendimet që ka marrë më 2004 dhe 2005, kur ka ngritur aktakuzë kundër Haradinajt. Pres që thirrja për hetime të mbështetet edhe një prokuror i lartë për krime lufte, sepse ata e kuptojnë profesionalizmin dhe drejtësia. E mbi të gjitha e kuptojnë integritetin”.

Avokati i haradinajt e mbështet këtë propozim për hetim ndaj sjelljes së Carla del Pontes.

“Por, unë shkoj më tej. Në bazë të përvojës në Tribunalin e Hagës ajo është emëruar të punojë për krimet e supozuara në Siri. Ajo nuk mund të punojë në këtë detyrë të re derisa të përfundojnë hetimet për këtë sjellje të keqe të saj. Meqë nuk është përgjigjur në kërkesën që të kërkojë falje, atëherë duhet të heq dorë nga Siria derisa të përfundojnë hetimet kundër saj. Dhe, nëse refuzon të largohet vullnetarisht, atëherë do t’i kërkoj Këshillit për të Drejtat e Njeriut që ta pezullojnë atë”.

Ish-kryeministri Ramush Haradinaj u është drejtuar qytetarëve të shumtë të cilët janë mbledhur në sheshin “Nënë Tereza” në Prishtinë duke falënderuar të gjithë për mbështetjen.

Haradinaj deklaroi se ai do të punoj për ngritjen e qeverisjes, demokracisë dhe zhvillimit ekonomik.

"E di që nuk jemi parë moti dhe kemi shumë çka të flasim, por unë si gjithmonë do të kursej fjalët por edhe jo punën" ka thënë Haradinaj, shkruan Indeksonline.

Fjalimi i Haradinajt është përcjellur gjatë nga duartrokitje, brohoritje dhe fishekzjarre nga qytetarët.

Ata kanë thirr emrin e tij në shenjë respekti dhe përkrahje.